प्रधानमंत्रीक निर्देश पर सीबीआई कयलक केजरीवालकेँ गिरफ्तार : संजय सिंह

नई दिल्ली
*

आम आदमी पार्टीक सांसद संजय सिंह सीबीआई द्वारा अरविंद केजरीवालक गिरफ्तारीकेँ लऽ कऽ पीएम मोदीपर हमला कयलनि अछि। ओ कहलनि जे पीएम मोदीक निर्देश पर सीबीआई मुख्यमंत्रीकेँ गिरफ्तार कयलक अछि।
संजय सिंह कहलनि, “अदालत (राउज एवेन्यू कोर्ट) अपन आदेशमे कहलक जे ईडी लग अरविंद केजरीवालक खिलाफ कोनो सबूत नहिं अछि आ ओ दुर्भावनापूर्ण उद्देश्यसँ काज कऽ रहल अछि। अरविन्द केजरीवालक विरुद्ध ईडी लग कोनो पैसाक लेनदेन नहिं अछि, कोनो सबूत नहिं अछि, पाइक वसूली नहिं अछि आ तेँ अरविंद केजरीवाल निर्दोष छथि। आ एहि बीच ईडीक लोक आदेशक प्रति बिना लेने असंवैधानिक, अवैध तरीकासँ उच्च न्यायालय पहुँचल आ ओहि जमानत पर रोक लगा देलक। अरविन्द केजरीवालकेँ केन्द्र सरकार, पीएम मोदीक निर्देश पर सीबीआई गिरफ्तार कयलक।

संजय सिंह कहलनि, ‘सीएम केजरीवालकेँ सुप्रीम कोर्टसँ जमानत भेटब निश्चित छल, तखन मोदीक सरकार सीबीआईसँ कहलक जे अरविंद केजरीवालकेँ तत्काल गिरफ्तार करू। जाँच एजेंसीसभक कतेक घोर दुरुपयोग भऽ रहल अछि, एकर एहिसँ पैघ उदाहरण नहिं भऽ सकैत अछि। प्रधानमंत्री जी, पूरा देश देख रहल अछि जे अहाँ कोन द्वेषसँ काज कए रहल छी। आ इंडिया गठबंधनक सभ दल अहाँक ईडी आ सीबीआईक एहि कारवाईक विरुद्ध संसद भवनक प्रांगणमे विरोध प्रदर्शन करत। ईडी सीबीआई केर दुरूपयोगक खिलाफ आंदोलन करत।