टी-२० विश्व कप २०२४ मे टीम इंडियाक जीतक बाद दुनिया भरिसँ खेलाड़ीसभकेँ बधाई संदेश भेटि रहल अछि। प्रधानमंत्री नरेन्द्र मोदी सेहो भारतीय टीमकेँ एहि जीतपर बधाई देलनि। ओ रविकेँ भारतीय क्रिकेट टीमसँ फोन पर गप्प कयलनि आ फोन पर पूरा टीमकेँ बधाई देलनि। ओ रोहित शर्माकेँ हुनक शानदार कप्तानीक लेल बधाई देलनि आ टी-२० कैरियरक प्रशंसा कयलनि। ओ फाइनलमे विराट कोहलीक पारी आ भारतीय क्रिकेटमे हुनक योगदानक सेहो प्रशंसा कयलनि। प्रधानमंत्री मोदी हार्दिक पांड्याक अंतिम ओवरक लेल आ सूर्यकुमार यादवक कैच लेबाक लेल प्रशंसा कयलनि। ओ जसप्रीत बुमराहक योगदानक सेहो प्रशंसा कयलनि। प्रधानमंत्री राहुल द्रविड़केँ भारतीय क्रिकेटमे हुनक योगदानक लेल धन्यवाद सेहो देलनि।
प्रधानमंत्री कहलखिन, “अहाँ सभ देशवासीक दिल जीत लेलहुँ।”
प्रधानमंत्री नरेन्द्र मोदी शनिदिन टी-२० विश्व कपमे दक्षिण अफ्रीकापर शानदार जीतक लेल भारतकेँ बधाई देलनि। पीएम मोदी कहलनि कि, “टीम इंडिया एकक बाद एक शानदार जीत हासिल कय पुरा टूर्नामेंट केर रोचक बना देलक। एहि भव्य जीतक लेल सब देशवासीक तरफसँ भारतकेँ बहुत-बहुत बधाई। आइ १४० करोड़ देशवासी अहाँक शानदार प्रदर्शन पर गर्व महसूस कए रहल छथि। अहाँ खेलक क्षेत्रमे विश्व कप जीतलहुं मुदा अहाँ भारतक हर गली आ इलाकामे देशवासीक दिल जीत लेलहुं। एहि टूर्नामेंटकेँ एकटा विशेष कारणसँ सेहो याद राखल जायत। एतेक देश, एतेक टीम आ एकटा मैच नहिं हारब कोनो छोट उपलब्धि नहिं अछि। अहांसभ क्रिकेट जगतक हर महारथी सभक गेंद पर खेललहुं आ शानदार जीत हासिल करैत रहलहुं। एकक बाद एक जीतबाक ई परम्परा अहाँक मनोबल बढ़बैत रहल आ एहि टूर्नामेंटकेँ रोचक सेहो बना देलक। अपन तरफसँ हम अहाँके बहुत-बहुत बधाई दैत छी आ अहाँ सभकेँ बहुत-बहुत शुभकामना दैत छी।’
राष्ट्रपति द्रौपदी मुर्मू ट्वीट कयलनि, ‘अहाँक उपलब्धिक उत्सव सदैव मनाओल जायत आ स्मरण कयल जायत। भविष्यक लेल अहाँकेँ शुभकामना, हम अहाँकेँ एहि तरहेँ प्रोत्साहित करैत रहब। विश्व कप जीतबा पर टीम इंडिया केर बधाई। कहियो हारि नहिं मानबाक जज्बा आ कठिन परिस्थितिक सामना कय अहाँसभ पूरा टूर्नामेंटमेँ शानदार प्रदर्शन कयलौंह अछि। फाइनल मैचमे ई असाधारण जीत छल। टीम इंडिया ! हमरा अहाँ पर गर्व अछि।”
