दिल्लीक मुख्यमंत्री हिन्दीमे रविकेँ एकटा एक्स पोस्टमे लिखलनि, “हम माननीय सर्वोच्च न्यायालयक आदेशपर २१ दिनक लेल चुनाव अभियानक लेल बाहर आयल छलहुँ। हम माननीय सर्वोच्च न्यायालयक बहुत आभारी छी। आइ हम तिहारमे आत्मसमर्पण करब। हम ३ बजे घरसँ निकलब। पहिने हम राजघाट जायब आ महात्मा गाँधीकेँ श्रद्धांजलि देब। ओतयसँ हम हनुमानजीक आशीर्वाद लेबाक लेल कनॉट प्लेसक हनुमान मन्दिर जाएब। आ ओतयसँ हम पार्टी कार्यालय जायब आ सभ कार्यकर्ता आ पार्टी नेतासँ भेंट करब। ओतएसँ हम फेर तिहारक लेल निकलब। आहाँ सभ अपन देखभाल करैत रहब। हम जेलमे आहाँक बारेमे सोचैत रहब। जँ आहाँ खुश रहब तखन अहाँक केजरीवाल सेहो जेलमे खुश रहता। जय हिन्द।”
अरविन्द केजरीवाल अपन अंतरिम जमानत समाप्त भेलाक बाद रविदिन तिहाड़ जेलक अधिकारीक समक्ष आत्मसमर्पण कयलनि। साँझमे तिहाड़ जेल पहुँचबासँ पहिने अरविंद केजरीवाल एकटा बैसारकेँ सम्बोधित कयलनि जतय ओ दावा कयलनि जे ०१ जूनकेँ विभिन्न मीडिया संस्थान द्वारा प्रसारित एक्जिट पोल ‘नकली’ अछि।
केजरीवाल आत्मसमर्पणसँ पहिने पार्टी कार्यालयमे कहलनि जे लोकसभा चुनावक २०२४ केर एक्जिट पोल काल्हि सामने आयल। लिखित रूपमे लिअ, ई सभ एक्जिट पोल नकली अछि। एकटा एक्जिट पोल राजस्थानमे भाजपाकेँ 33 सीट देलक जखन कि ओतय मात्र 25 सीट अछि।
असली मुद्दा ई अछि जे गिनतीक दिनसँ तीन दिन पहिने हुनका फर्जी एक्जिट पोल किएक करय पड़लनि। एहि सम्बन्धमे बहुत बात अछि, ओहिमेसँ एकटा ई अछि जे ओ मशीन (ईवीएम) मे हेरफेर करबाक प्रयास कऽ रहल छथि।
जानकारीक लेल बता दी जे अरविन्द केजरीवालकेँ प्रवर्तन निदेशालय (ईडी) २१ मार्चकेँ आबकारी नीति मामिलामे गिरफ्तार कयलक। आबकारी नीतिसँ जुड़ल धनशोधन मामिलामे सर्वोच्च न्यायालय द्वारा अंतरिम जमानत देलाक बाद केजरीवालकेँ १० मईकेँ जेलसँ रिहा कऽ देल गेल छल। सर्वोच्च न्यायालय हुनका शनिदिन समाप्त भेल लोकसभा चुनावमे प्रचार करबाक लेल अंतरिम जमानत देने छल।
जांच एजेंसीक मानब अछि जे दिल्लीक मुख्यमंत्री नीतिक मसौदा तैयार करबामे आ शराब लाइसेंसक बदलामे घूस लेबामे महत्वपूर्ण भूमिका निभौलनि।
एजेंसी दावा केलक जे आम आदमी पार्टीकेँ १०० करोड़ रिश्वत भेटल। एकर उपयोग तखनि गोवा आ पंजाब चुनाव अभियानक वित्तपोषण लेल कयल गेल छल।
