पटना छात्रक हत्याक मामिलामे एकटा आरोपी गिरफ्तार, सड़क पर उतरल लोक

पटना
*

पटनाक एकटा लॉ कॉलेजमे सोमदिन एकटा छात्रक पीट-पीट कऽ हत्या करबाक मामिलामे एकटा व्यक्तिकेँ गिरफ्तार कयल गेल अछि। दोसर दिस, छात्र लोकनि एहि घटनाक विरोधमे मंगल दिन सड़क पर उतरि गेलाह आ आरोपीकेँ शीघ्र गिरफ्तारीक मांग कयलनि।
सड़क पर उतरल लोककेँ तितर-बितर करबाक लेल पुलिसकेँ हल्लुक बलक प्रयोग करय पड़ल। पटना (पूर्व) केर पुलिस अधीक्षक भरत सोनी कहलनि कि छात्र हर्षक हत्याक मामिलामे पुलिस चंदन यादवकेँ गिरफ्तार कयलक अछि। ओ पटना कॉलेजक छात्र अछि आ वैऽह एहि मामिलामे लाइनरक भूमिका निभौलक आ षड्यंत्र कयलक अछि, ई आरोप लागल अछि।

ओ कहलनि जे एहि मामिलाक जाँच आ आरोपीकेँ गिरफ्तार करबाक लेल एकटा विशेष जाँच दल (एसआईटी)क गठन कयल गेल अछि। गिरफ्तार आरोपीसँ पूछताछ कएल जा रहल अछि। आन आरोपीक गिरफ्तारीक लेल छापा मारल जा रहल अछि। एहि पूरा मामिलाक साक्ष्य जुटाबय लेल एकटा टीमक गठन कयल गेल अछि।

हर्षक हत्याक विरोधमे आक्रोशित छात्र सभ सड़क पर उतरि गेलाह। ओ सभ सड़क पर आगजनी कय यातायातकेँ बाधित करबाक प्रयास कयलनि। एहि दौरान पुलिस प्रदर्शनकारी छात्रसभकेँ तितर-बितर करबाक लेल कारगिल चौक पर हल्का बलक प्रयोग कयलक।

बीएन कॉलेजक छात्र हर्ष राज (२२) केँ सोमदिन दुपहरमे पटनाक लॉ कॉलेज परिसरमे अज्ञात हमलावर द्वारा पीटि-पीटि कऽ हत्या कऽ देल गेल। घटनाक समय बीए अंतिम वर्षक छात्र हर्ष परीक्षा देलाक बाद बाहर आयल छलाह। पहिनेसँ घात लगा कऽ हमला कयल गेल, नकाबपोश उपद्रवी सभ छात्रपर लाठी आ ईंटासँ हमला कयलक। एहिसँ छात्रक माथमे गम्भीर चोट लागल।

घटनाक बाद आरोपी भागि गेल छल। वैशालीक लालगंजक निवासी छात्र पर दिनदेखारे भेल हमलासँ कॉलेज परिसरमे अफरातफरी मचि गेल। बादमे छात्रसभक सहायतासँ हुनका पीएमसीएच लऽ जायल गेल, जतय चिकित्सक हुनका मृत घोषित कऽ देलनि।