राज्यसभा सांसद मनोज झा पटनामे प्रेस कॉन्फ्रेंस कए सत्तारूढ़ दल पर पैघ आरोप लगओलनि अछि। कहलनि जे राज्य भवनसँ अधिकारीसभसँ गप्प कयल जा रहल अछि, ई ठीक नहिं अछि।
राजदक राज्यसभा सांसद मनोज झा आ मुख्य प्रवक्ता शक्ति यादव पटना स्थित राष्ट्रीय जनता पार्टी कार्यालयमे प्रेस कॉन्फ्रेंस कयलथि, जाहि दौरान ओ नरेंद्र मोदी आ एनडीए पर निशाना साधलनि। सांसद मनोज झा प्रधानमंत्री मोदी आ गृह मंत्री अमित शाह पर पैघ आरोप लगओलनि अछि। ओ कहलनि जे राज्य भवनसँ अधिकारीसभक सङ्ग बातचीत कयल जा रहल अछि। अधिकारीसभकेँ सचेत रहबाक चाही जे व्यवस्था आ सरकार दुनू बदलि रहल अछि। मनोज झा कहलनि जे कानून तोड़बाक प्रयास करब तऽ एहि बेर पटनासँ दिल्ली तक खूब प्रतिरोध होएत।
सांसद मनोज झा कहलनि जे छठम चरणक चुनाव २५ मईकेँ होबय वाला अछि आ पूरा भारतक संग-संग बिहारमे सेहो बदलाव आबि रहल अछि।
मनोज झा प्रधानमंत्री पर पैघ हमला करैत कहलनि जे प्रधानमंत्री कहैत छथि जे अहाँक नल लऽ जायत, भैंस लऽ जाएत, मंगलसूत्र छीन लेत। ओ कहलनि जे प्रधानमंत्री इहो कहलनि अछि जे भगवान हुनका दूतक रूपमे पठौलनि अछि। जँ हमसभ एना घरमे गप्प करब तखन हमरासभकेँ डॉक्टर लग लऽ जायल जायत, कहल जायत जे दिमाग ठिक नहिं अछि।
छपरा घटना पर मनोज झा कहलनि जे सब किछु केर हिसाब राखल जाएत। सम्राट चौधरीक एहि कथन पर जे रोहिणी आचार्य राबड़ी देवीक अंगरक्षकक संग घूमि रहल छथि, मनोज झा कहलनि जे हमसभ जनैत छी जे ओ हताश छथि। शांत रहू, अहांक लेल सेहो वैकल्पिक व्यवस्था कएल जाएत। मनोज झा कहलनि जे जँ इंडिया गठबंधन सरकारमे आओत तखनि हम सभ एक संग बैसि प्रधानमंत्रीक चुनाव करब।
राजदके मुख्य प्रवक्ता शक्ति यादव कहलनि कि राज्यपाल भवनसँ अधिकारी सबकेँ मुख्य सचिवसँ पर्यंत बात कराओल जा रहल अछि। प्रशासनिक अधिकारी सभमे लगातार हस्तक्षेप कयल जा रहल अछि। राष्ट्रीय जनता दलक मुख्य प्रवक्ता अधिकारीसभकेँ कानून हाथमे नहिं लेबाक चेतौनी देलनि कि जे अधिकारी कानूनसँ छेड़छाड़ करत, कानून ओकरा छोड़त नहिं, ओकरा कानूनक सामना करय पड़त।
