केंद्रीय गृहमंत्री अमित शाह कांग्रेस पर पैघ हमला करैत कहला जे यूपीए शासनमे देशमे १२ लाख करोड़क घोटाला आ भ्रष्टाचार भेल।
गृहमंत्री अमित शाह बृहस्पतिकेँ सिद्धार्थ नगरमे चुनावी सभाकेँ संबोधित करैत कहला जे घमंडिया गठबंधन भ्रष्ट लोकक जुटान अछि। यूपीए शासनमे देशमे १२ लाख करोड़क घोटाला आ भ्रष्टाचार भेल। ई लोकनि अपन परिवारक लेल निकलल छथि । जखन कि मोदीक परिवार पुरा भारतक नागरिक अछि।
ओ कहलनि जे इंडी गठबंधनक प्रधानमंत्री के हेताह ? हुनकर एकटा नेता कहलनि कि पाँच साल बारी-बारीसँ प्रधानमंत्री बनत । राहुल बाबा, ई किरानाक दोकान नै छै, १४० करोड़क महान देश छै। घंमडिया गठबंधन भ्रष्ट लोकक जुटान अछि। इंडिया एलायंसक इरादा एससी-एसटी, ओबीसीक आरक्षण केर लूटय केर अछि।
शाह आगू कहलनि जे बंगाल हाईकोर्टक फैसला आबि गेल अछि। बंगाल सरकार ओबीसी सूचीमे १८० मुस्लिम जातिकेँ शामिल कएने छल आ हमर सबहक पिछड़ा वर्गक आरक्षणक अधिकार मुसलमानकेँ दऽ देने छल। हमर संविधानमे धर्मक आधार पर आरक्षणक प्रावधान नहिं अछि।अतः २०१० सँ २०२४ केर बीच बंगाल सरकार द्वारा मुस्लिम जातिकेँ देल गेल सबटा ओबीसी आरक्षण हाईकोर्ट द्वारा खारिज कय देल गेल अछि।
अमित शाह कहलनि जे, एहि चुनावमे एक दिस पूरा परिवारवादी कुनबा अछि, जकर उद्देश्य अपन बेटा-बेटीकेँ राजनीतिमे बढ़ावा देब अछि। लालू यादव अपन बेटाकेँ मुख्यमंत्री बनाबय चाहैत छथि। उद्धव ठाकरे अपन बेटाकेँ मुख्यमंत्री बनाबय चाहैत छथि। स्टालिन अपन बेटाकेँ मुख्यमंत्री बनाबय चाहय छथि। ममता अपन भतीजाकेँ मुख्यमंत्री बनाबय चाहय छथि। सोनिया जी अपन बेटा राहुल गांधीकेँ प्रधानमंत्री बनाबय चाहैत छथि।
ओ आगू कहलनि जे समाजवादी पार्टी राम भक्त पर गोली चला देलक, सैकड़ों कारसेवककेँ गोली मारल गेल। ई चुनाव राम भक्त पर गोलीबारी करय वाला आओर राम मंदिर बनेनिहारक बीच केर चुनाव अछि। भाजपा सरकारक उपलब्धि गिनाबैत ओ कहलनि जे, एतय सड़क बनल, मेडिकल कॉलेज बनल, शिक्षाक क्षेत्रमे काज भेल, भविष्यमे आओर काज होयत।
