सीएम साइंस कॉलेजमे स्वयं वित्त पोषित योजना अंतर्गत संचालित कयल जा रहल तीन वर्षीय बैचलर ऑफ कंप्यूटर एप्लीकेशन (बीसीए) पाठ्यक्रम केर बिहार सरकारक सक्षम प्राधिकारसँ स्वीकृति भेटला बाद आब अखिल भारतीय तकनीकी शिक्षा परिषद (एआईसीटीई) सेहो मान्यता दऽ देलक अछि। एआईसीटीई द्वारा निर्गत मान्यता पत्रमे सीएम साइंस कॉलेजमे बीसीए पाठ्यक्रममे कुल 60 सीट पर नामांकन केर बिहार सरकारक सक्षम प्राधिकार द्वारा देल गेल स्वीकृति केर बरकरार रखबाक अनुमति देल गेल अछि। जानकारी दैत प्रधानाचार्य प्रो दिलीप कुमार चौधरी बतेलनि जे महाविद्यालयमे सीबीसीएस शिक्षण पद्धति केर अंतर्गत संचालित तीन वर्षीय एहि पाठ्यक्रम लेल पछिला सत्रसँ नामांकन प्रारंभ अछि आ वर्तमान सत्र 2024-27 मे नामांकन लेल आवेदन केर तिथि सीबीएसई बोर्डक परीक्षा परिणाम विलंबसँ जारी होयबाक कारण 31 मई धरि विस्तारित कऽ देल गेल अछि। जखन कि जून महीनाक तेसर सप्ताहमे लिखित एवं मौखिक परीक्षाक आधार पर मेधा सूची तैयार कऽ नामांकन केर प्रक्रिया प्रारंभ कऽ देल जायत।
प्रधानाचार्य महाविद्यालयमे संचालित भऽ रहल बीसीए पाठ्यक्रम केर एआईसीटीईसँ मान्यता भेटला पर प्रसन्नता व्यक्त करैत कहलनि जे ई भेलासँ सीएम साइंस कॉलेजसँ एहि पाठ्यक्रम केर पूरा केनिहार छात्र-छात्राकेँ आब राष्ट्रीय स्तर पर सेहो पहिचान भेटबाक मार्ग प्रशस्त होयत। प्रधानाचार्य महाविद्यालयमे संचालित बीसीए पाठ्यक्रम केर एआईसीटीईसँ मान्यता भेटला पर महाविद्यालयक सभ शिक्षक आ कर्मचारी, खास कऽ बीसीए पाठ्यक्रमक संयोजक डा अभिषेक शेखर एवं पाठ्यक्रम सहायक अभिषेक कुमारकेँ बधाई देलनि अछि।