‘जानकी पूजनोत्सव’ मैथिल समन्वय समिति, अपन केन्द्रिय कार्यालय मुलुण्ड स्थित कोटेश्वर प्लाजामे भक्तिभाव एवम् उल्लासपूर्ण वातावरणमे बैशाख शुक्ल पक्ष नवमी तिथिक पावन सुअवसर पर जानकी नवमी आयोजित कयलक। भगवतीक श्रीविग्रह पर पुष्प माला अर्पित करैत तथा मधुरमय स्तुति द्वारा कार्यालय परिसर प्रासादिक बनि गेल। समिति विगत् २०१६ ईस्वीसँ जानकी नवमी आयोजित करैत आबि रहल अछि। मिथिला समेत देश-विदेशमे जाहिठाम मिथिलावासी रहि रहल छथि हर्षोल्लास तथा धूमधामक संग भगवती जानकीजीक जन्म-जयंती आयोजित कयलनि। मिथिलाक बेटी भगवती जानकी मानव समाजक कल्याण करथि, समवेत प्रार्थना निवेदित कयल गेल।
एहि अवसर पर समितिक संस्थापक अध्यक्ष प्रेमचन्द्र झा (प्रेमजी) कहलनि जे हमरा लोकनि संकल्प ली जे मिथिलाक पावन संस्कृति सदैव फहरायत रहय। हमरा सभक बुद्धि तथा विवेक सात्विक बनल रहय। ई प्रेरणा भगवती जानकी प्रदान करथि। राजकुमार झा भगवतीक विभिन्न नामकेँ श्रद्धापूर्वक स्मरण करैत मिथिला अपन वैभव तथा उत्कर्षकेँ प्राप्त करय, प्रार्थना कयलनि। वक्ता लोकनि अपन उद्गार व्यक्त करैत कहलनि, मिथिलाक पावन भूमिमे जन्म लऽ मिथिलेशनंदिनी जानकी विश्वक समक्ष अपन जीवन-चरित्रक माध्यमें त्याग, पतिव्रत धर्म, करूणा तथा सत्य रक्षार्थक प्रति जाहि तरहें उदाहरण प्रस्तुत कयलनि दुर्लभ अछि। आदिकवि बाल्मीकि रामायण ग्रंथमे लिखैत छथि जे रामायण सीताक चरित्र-ग्रंथ थिक। “सीतायाश्चरितं महत्।”
आयोजनक अवसर पर समितिक कार्यालयमे पंकज झा, प्रमोद झा, आलोक झा, नरसिंह भगत समेत अनेकों सदस्यगण उपस्थित भऽ भगवतीक विग्रह पर पुष्प समर्पित कयलनि तथा मिथिलावासीकेँ जानकी नवमीक अशेष शुभकामना दैत सुगति, प्रगति तथा उन्नतिक पथ पर सदैव अग्रसर हेबाक कामना कयलनि।
