कांग्रेस नेता राहुल गांधी मंगलदिन चाईबासामे एकटा चुनावी जनसभाकेँ सम्बोधित करैत कहलनि जे देशमे पानि, जंगल, जमीन पर आदिवासीसभक पहिल अधिकार अछि। भारतीय जनता पार्टी (भाजपा) आदिवासीसभकेँ वनवासी कहि ई अधिकार लेबय चाहैत अछि। ई हमर संकल्प अछि जे हम हुनका इ अधिकार देब।
राहुल गांधी सभामे भारतीय संविधानक पुस्तक देखाबैत कहलनि जे भाजपा एकरा फाड़ि कऽ फेंकय चाहैत अछि। एहि देशमे आदिवासी, दलित, पिछड़ाकेँ जे किछु भेटल अछि, ओ एहि किताबक कारण भेटल अछि। हमर पैघ नेता सभ एहि किताबक लेल बलिदान देलनि। संविधानक एही किताबक बदौलत अहाकेँ आरक्षण, नौकरी भेटैत अछि। भाजपा एहि किताबकेँ नष्ट करए चाहैत अछि आओर हम एकरा लेल जान देबए लेल तैयार छी।
कांग्रेस नेता देशक टाॅप ब्यूरोक्रेसीमे आदिवासी अधिकारीसभक कम भागीदारीक प्रश्न उठौलनि। ओ कहलनि जे देशक कुल जनसंख्याक आठ प्रतिशत आदिवासी अछि। लेकिन, एकर अनुसार हुनका १०० रुपयामे दस पैसा सेहो खर्च करयकेँ अधिकार नहिं अछि। राहुल गाँधी वादा कयलनि जे यदि ‘इंडिया’ गठबन्धन सरकार बनैत अछि तँ गरीब, पिछड़ा आ दलितक प्रत्येक परिवारक प्रत्येक महिलाक बैंक खातामे एक लाख टाका राखि देल जायत।
ओ कहलनि जे हम देशमे करोड़ो लोककेँ लखपति बना देब। ओ स्नातक आ डिप्लोमा धारककेँ पहिल नौकरी देब, मनरेगाक मजदूरी २५० रुपैयासँ बढ़ाकऽ ४०० रुपैया प्रतिदिन करबाक वादा सेहो कयलनि। कांग्रेस नेता कहलनि कि जँ हमर सरकार बनत तऽ हम देशमे ५० प्रतिशत आरक्षणक सीमा समाप्त करब। ओ कहलनि जे हेमंत सोरेनकेँ गिरफ्तार कऽ जेलमे डालि देल गेल किएक तँ ओ आदिवासी छथि। झारखण्डक मुख्यमंत्री चम्पई सोरेन आ कल्पना सोरेन सेहो जनसभाकेँ सम्बोधित कयलनि।
