पीएम मोदीक बारेमे मीसा भारतीक बयान पर भाजपा-जदयू दुनू दल आपत्ति जतौलक अछि। जदयू प्रवक्ता नीरज कुमार सवाल उठौलनि जे की मीसा भारती अपन पिताक विषयमे एहने बजैत छथि।
लालू प्रसाद यादवक पैघ बेटी आ पाटलिपुत्र लोकसभा सीटसँ उम्मीदवार मीसा भारती प्रधानमंत्री मोदीक बारेमे एहन टिप्पणी कयलनि जेकर कारण भाजपा आ जेडीयू दुनू मीसा भारती पर हमला कयलक अछि। मीसा भारती प्रधानमंत्री मोदीकेँ बूढ़ कहि कटाक्ष कयलनि अछि। मीसा ई टिप्पणी पाटलिपुत्र संसदीय क्षेत्रमे प्रचारक क्रममे एकटा सभाकेँ सम्बोधित करैत कयलनि। आब भाजपा आ जेडीयू सवाल उठौलक अछि जे की मीसा अपन पिताक बारेमे ओहिना बजैत छथि।
पाटलिपुत्र लोकसभा सीटक प्रचारक क्रममे मीसा अग्निवीर योजनाकेँ लऽ कऽ एनडीए सरकारपर निशाना साधलनि। ओ कहलनि “ई सरकार १० सालमे की कयलक ? ई अग्निवीर योजना आनलक। देशक लेल लड़यवाला युवाकेँ २२ वर्षक आयुमे सेवानिवृत्त कऽ देल जायत। दोसर दिस, हमरा लग एकटा बूढ़ प्रधानमंत्री छथि जे ७५ वर्षक आयुमे एखनो लगातार तेसर कार्यकाल चाहैत छथि।
आब भाजपा आ जेडीयू दुनू पीएम मोदीक बारेमे देल गेल बयान पर मीसा भारती पर पलटवार कयलक अछि। भाजपा नेता शाहनवाज हुसैन मीसासँ कहलनि जे पीएम मोदी लालू जीसँ बहुत छोट छथि। ककरो बूढ़ कहैत काल कमसँ कम हुनका ध्यान रखबाक चाही जे ओ केकर अपमान कऽ रहल छथि। ओतहि जेडीयूक प्रवक्ता नीरज कुमार सवाल उठौलनि जे की मीसा भारती अपन पिताक विषयमे ओहिना बजैत छथि ?
बिहारक पाटलिपुत्र लोकसभा सीटपर अंतिम चरणमे १ जूनकेँ मतदान होयत। मीसा भारती एहि सीटसँ वर्तमान सांसद रामकृपाल यादवक विरुद्ध चुनाव लड़तीह। रामकृपाल कहियो लालू यादवक निकट छलाह। मुदा, ओ २०१४ मे भाजपामे शामिल भऽ गेलाह। ओ २०१४ आ २०१९ दुनू लोकसभा चुनावमे पाटलिपुत्रसँ मीसाकेँ पराजित कयलनि। जेडीयू कहैत अछि जे मीसा सबक सीखत। रामक आशीर्वाद राम कृपालक संग अछि।
