कांग्रेस नेता सैम पित्रोदाक भारतमे ‘विरासत कर’ लगयबाक माँग वाला बयानसँ पार्टी पल्ला झाड़ि लेलक अछि। गौरतलब अछि जे इंडियन ओवरसीज कांग्रेसक अध्यक्ष सैम पित्रोदाक सम्पत्ति बँटवारा वाला बयान पर पीएम मोदीक बयानक बाद विरासत कर पर अपन टिप्पणीसँ भारतक राजनीतिमे हलचल मचा देलनि अछि। सैम पित्रोदा कहलनि, “अमेरिकामे विरासत कर अछि। जँ ककरो लग १० करोड़ डॉलरक सम्पत्ति अछि, जखन ओ मरि जाइत अछि तँ ओ अपन बच्चासभकेँ मात्र ४५% दऽ सकैत अछि। 55 प्रतिशत सरकार द्वारा हड़पि लेल जाइत अछि। ई एकटा रोचक नियम अछि। एहिमे कहल गेल अछि जे अहाँ अपन पीढ़ीमे धन उत्पन्न कयलहुँ आ आब जखन अहाँ जा रहल छी तखन अहाँकेँ अपन धन जनताक लेल छोड़बाक चाही। सभटा नहिं, आधा। हमरा इ उचित कानून पसन्द अछि।
रमेश एक्स पर एकटा पोस्टमे कहलनि, “ओ हमरा आ दुनियाक कतेको लोकक लेल एकटा महान मार्गदर्शक, मित्र आ मार्गदर्शक रहल छथि। पित्रोदा कोनो मुद्दा पर स्वतंत्र रूपसँ अपन विचार व्यक्त कऽ सकैत छथि। जाहिर अछि, लोकतंत्रमे लोककेँ अपन व्यक्तिगत विचार पर चर्चा करय आ व्यक्त करबाक अधिकार छैक। एकर अर्थ ई नहि अछि जे हुनक विचार सदैव कांग्रेसक दृष्टिकोणकेँ प्रतिबिम्बित करैत अछि। कतेको बेर इ नहिं होइत अछि। ई एहि समयक हुनकर बयानकेँ सनसनीखेज बनयबाक आ एकरा परिप्रेक्ष्यसँ बाहर लऽ जायब पीएम मोदीक दुर्भावनापूर्ण चुनाव अभियानसँ ध्यान हटाबयक प्रयास अछि।”
दोसर दिस कांग्रेस अध्यक्ष मल्लिकार्जुन खड़गेसँ पित्रोदाक बयानक बारेमे पूछल गेल छल मुदा ओ कहलनि, “देशमे संविधान अछि। हमरा लग एहन कोनो विचार नहिं अछि। अहां अपन विचार हमरा मुंहमे किएक राखए चाहैत छी ? पीएम मोदी ई खेल मात्र वोटक लेल खेल रहल छथि।”
एहि पर शशि थरूर कहलनि जे सैम पित्रोदा जे कहलनि ओ कांग्रेसक घोषणापत्रमे नहिं अछि। हम एकटा लोकतांत्रिक पार्टी छी जतय सभकेँ अपन व्यक्तिगत विचार व्यक्त करबाक अधिकार अछि। मुदा हमर नेता पार्टी द्वारा जारी घोषणापत्र पर ठाढ़ छथि आ वैऽह पार्टीक रुख अछि।
