बिहारक भारत-नेपाल सीमा क्षेत्रमे चोरकेँ पीट-पीट कऽ मारि देलक भीड़

सीतामढ़ी समदिया
*

सीतामढ़ी जिलासँ मॉब लिंचिंगक मामिला सोझाँ आयल अछि। परिहार थाना क्षेत्रक झपहा मसहा गाममे भीड़ चोरकेँ पीट-पीट कऽ मारि देलक। ई घटना शनिदिन देर राति भारतक समीप सीमापर भेल। पुलिस सूचना पर पहुँचल आ जाँच शुरू कऽ देलक। कहल जा रहल अछि जे रविन्द्र महतो तंबूक काज करैत छथि। लगभग २:३० बजे रविन्द्र काजसँ घर घुरि अयलाह। एहि दौरान ओ देखलनि जे तीनटा चोर घरमे घुसि गेल अछि। जखन ओ विरोध कयलनि तखन एकटा चोर हुनक माथपर हथियारसँ प्रहार कयलक। जाहि कारणेँ रविन्द्रक माथ फाटि गेल। जखन रविन्द्र शोर मचेलनि तखन गामक लोक जमा भऽ गेल आ एकटा चोरकेँ पकड़ि लेलक। जखन कि ओकर दोसर दूटा साथी भागि गेल। पकड़ल गेल चोरकेँ भीड़ पीटलक। ओकर मौकापर मृत्यु भऽ गेल। आगुक जाँच चलि रहल अछि।