बिहारमे आगि उगलि रहल छथि सूर्य, कतेको जिलामे तापमान ४३°, लू’ केर स्थिति

पटना
*

बिहारमे गर्मी बढ़ि रहल अछि। ११ जिलामे तापमान ४१ डिग्रीकेँ पार कऽ ४३ डिग्री धरि पहुँचि गेल अछि। अगिला ५ दिन धरि गरमीसँ राहत भेटबाक कोनो संभावना नहिं अछि।
राज्यक तापमान लगातार बढ़ि रहल अछि आ गर्मीक प्रभाव देखल जा रहल अछि। शुक्रदिनसँ राजधानी पटना सहित ११ जिलामे तापमान ४१ डिग्रीकेँ पार कऽ ४३ डिग्री धरि पहुँचि गेल अछि। रातिमे गरमीक प्रभाव सबसँ बेसी पटनामे देखल गेल।

मौसम विभागक अनुसार, शनिदिन (२० अप्रैल) दक्षिण बिहारक सभ जिला आ राज्यक पश्चिमी भागक जिलामे तापमानमे वृद्धिक सङ्ग लू चलल। तापमानमे वृद्धिक सङ्ग १३ जिलामे लू’ केर चेतावनी जारी कयल गेल अछि। एहिमे बिहारक बेगूसराय, गोपालगंज, बक्सर, सीवान, कैमूर, शेखपुरा, नवादा, औरंगाबाद, खगड़िया, रोहतास, गया, लखीसराय आ जमुई जिला सम्मिलित अछि। एकर अतिरिक्त पटना सहित दक्षिण बिहारक अन्य जिलामे सेहो तापमानमे वृद्धि देखल जा सकैछ।

मौसम विज्ञान केन्द्र पटनाक अनुसार, राज्यमे शुष्क पश्चिमी हवाक प्रवाह जारी अछि। एहि कारणेँ राज्यक पश्चिमी आ दक्षिणी भागक जिलामे गरम दिनक स्थिति जारी रहत। अगिला दू दिन धरि पश्चिमी हवाक गति ३५ किलोमीटर प्रति घंटा रहबाक अनुमान अछि। एहि अवधिमे राज्यक अधिकतम तापमानमे दूसँ तीन डिग्रीक वृद्धि होयबाक सम्भावना अछि। एकर अतिरिक्त अगिला ५ दिन धरि गरमीसँ राहतक कोनो सम्भावना नहिं अछि। लोककेँ गर्मी आउर बेसी सहए पड़त। मौसम विभाग गर्मीसँ बचबाक लेल हरदम शीतल पेयक सेवन करबाक सलाह देलक अछि।

पछिला शुक्रदिनसँ लू’ देखल जा रहल अछि। राज्यक एगारह जिलामे तापमान ४१ डिग्री सेल्सियससँ ऊपर दर्ज कयल गेल जखन कि अधिकतम तापमान ४३ डिग्री सेल्सियस धरि पहुँचि गेल। शेखपुरामे लगातार एक सप्ताह धरि सबसँ बेसी तापमान दर्ज कयल जा रहल अछि आ शुक्रदिन सेहो शेखपुरामे अधिकतम तापमान ४३ डिग्री सेल्सियस दर्ज कयल गेल। राजधानी पटनामे अधिकतम तापमान ४१.५ डिग्री सेल्सियस दर्ज कयल गेल, जे १.८ डिग्री सेल्सियसक वृद्धि छल। भोजपुर अधिकतम तापमान ४२.३ डिग्री सेल्सियसक संग दोसर स्थान पर रहल।

न्यूनतम तापमानक सूचीमे पटना शीर्ष पर अछि। पटनामे रातिमे सबसँ बेसी न्यूनतम तापमान २७ डिग्री दर्ज कयल गेल। सबसँ कम न्यूनतम तापमान मोतिहारीमे २१ डिग्री सेल्सियस दर्ज कयल गेल। शुक्रदिन जाहि ११ जिलामे तापमान ४१ डिग्री सँ ४२ डिग्रीक बीच दर्ज कयल गेल, ओहिमे शेखपुरा आ पटनाक अतिरिक्त भोजपुर, औरंगाबाद, जमुई, नवादा, गया, डेहरी, नालंदा, बांका आ सिवान सम्मिलित अछि।