पूर्व केन्द्रीय मंत्री आ राष्ट्रीय लोक जनशक्ति पार्टी (आरएलजेपी) प्रमुख पशुपति कुमार पारस राजगकेँ समर्थन करबाक बात कहलनि अछि। एकटा बैसारक दौरान पशुपति कुमार पारस कहलनि जे हुनकर पार्टी दृढ़तासँ राजगक संग अछि आ आगू सेहो रहत। ओ कहलनि जे हुनकर पार्टी बिहारक सभ ४० लोकसभा सीटपर एनडीए उम्मीदवारक लेल प्रचार करत। एकर संगहि रालोजपाक कार्यकर्ता सेहो एनडीएक लेल प्रचार करत। शनिदिन पटनामे रालोजपा आ दलित सेनाक प्रदेश पदाधिकारी आ जिला अध्यक्षक बैसार पटनामे बजाओल गेल छल।
एहि बैसारक बाद पशुपति कुमार पारस कहलनि जे राष्ट्र आ राज्यक हितमे हुनकर पार्टी पीएम मोदीक नेतृत्वमे एनडीए गठबंधनकेँ समर्थन देबाक निर्णय लेलक अछि। ओ कहलनि जे बिहारक सभटा ४० लोकसभा सीटपर हमसभ एनडीए केर प्रत्याशीकेँ समर्थन करब। ओ आगू कहलनि जे एहि बेर एनडीएक सांसदक संख्या ४०० केर पार कऽ जायत। बिहारमे एनडीए गठबंधन सभ ४० सीट जीतत। ओ हाजीपुरक लोकसभकेँ आश्वासन देलनि जे राजनीतिमे सभ दिन एक समान नहिं होइत अछि। हम सब ईमानदारीसँ हाजीपुरक सेवा कयलहुँ।
बैसारमे रालोजपाक राष्ट्रीय उपाध्यक्ष सूरज भान सिंह सेहो उपस्थित छलाह। ओ कहलनि जे काका लग होय वा भतीजा लगमे होय, कोनो फर्क नहिं पड़ैत अछि, दुनू एनडीए परिवारक हिस्सा छथि। सूरज भान सिंह कहलनि कि एनडीए केर उम्मीदवारक समर्थन करय लेल हम पूरा ताकतक संग मैदानमे उतरब। हुनक अतिरिक्त रालोजपाक प्रदेश अध्यक्ष सांसद प्रिंस राज कहलनि जे हमसभ भाजपाक शीर्ष नेतृत्वक सोझाँ अपन बात रखलहुँ अछि। भाजपाक आश्वासन पर हम एनडीए केर समर्थन करय केर फैसला कयलहुँ। ओ कहलनि जे कार्यकर्ता सभक भावना जानबाक लेल आइ बैसारक आयोजन कयल गेल अछि।
