बिहार शिक्षक परिणाम २०२४, बीएसईबी कक्षा १ सँ ५ तकक शिक्षकक परिणाम घोषित कऽ देलक अछि। जे शिक्षक एहि परीक्षामे उत्तीर्ण भेलखिन हुनका आब राज्य कर्मचारीक दर्जा भेटत।
बीएसईबी योग्यता परीक्षा प्रथमक अन्तर्गत कक्षा १ सँ ५ केर प्राथमिक विद्यालयक शिक्षकक परिणाम घोषित कयलक अछि। ई परीक्षा १,४८,८४५ शिक्षकक लेल आयोजित कयल गेल छल, जाहिमे १,३९,०१० शिक्षक उत्तीर्ण भेल छथि। ९३.३९% शिक्षक एहि परीक्षामे उत्तीर्ण भेल छथि। ओतहि ९८३५ शिक्षक फेल भs चुकल छथि।
एहि परीक्षामे शामिल कक्षा १-५ केर शिक्षक https://www.bsebsakshamta.com वेबसाइट पर जा कऽ परिणाम देख सकैत छथि। संबंधित शिक्षक अपन आवेदन संख्या आ जन्मतिथि (dd-mm-yyy) दर्ज कऽ अपन परिणामक जाँच कऽ सकैत छथि।
कक्षा १-५ मे प्राथमिक विद्यालयक शिक्षक अभ्यर्थी सभकेँ अंग्रेजी भाषा आ हिन्दी वा उर्दू वा बङ्गालीमे सँ कोनो एकटा भाषाक परीक्षा देबाक छल। कक्षा १-५ मे हिन्दी विषयक १,२९,४३९ शिक्षक उम्मीदवार, उर्दू विषयक १९,३१७ शिक्षक अभ्यर्थी आ बंगाली विषयक ८९ शिक्षक अभ्यर्थी (तीनू विषयमे कुल १,४८,८४५ शिक्षक उम्मीदवार) एहि परीक्षामे सम्मलित भेलाह।
एहि परीक्षामे सम्मिलित कक्षा १-५क शिक्षकसभमे हिन्दी विषयक विकल्प भरनिहार १,२९,४३९ शिक्षकमेसँ १,२२,३४७ शिक्षक उत्तीर्ण भेल छथि, जकर उत्तीर्ण प्रतिशत ९४.५२ प्रतिशत अछि। एहि परीक्षामे उपस्थित १९,३१७ शिक्षकमे सँ १६,५७५ शिक्षक उत्तीर्ण भेल छथि। उत्तीर्ण प्रतिशत ८५.८१ प्रतिशत अछि। एहि परीक्षामे उपस्थित ८९ शिक्षकमेसँ ८८ शिक्षक उत्तीर्ण भेल छथि, जकर उत्तीर्ण प्रतिशत ९८.८८ प्रतिशत अछि।
संगहि, परीक्षा परिणामक अनुसार, योग्यता परीक्षा, २०२४ (प्रथम) मे कुल ९.८३५ शिक्षक अनुत्तीर्ण भेल छथि। जिनका ‘विशेष शिक्षक’ बनबाक लेल आगामी परीक्षा पास करय पड़त। जनतब जे स्थानीय निकायक शिक्षकक लेल राज्य कर्मचारीक दर्जा प्राप्त करबाक लेल कुल पाँच (०५) परीक्षामे सँ एकटा (०१) परीक्षा उत्तीर्ण करब अनिवार्य अछि। योग्यता परीक्षा, २०२४ (प्रथम)क अन्तर्गत कक्षा १-५मे शिक्षकसभक लेल परीक्षा २६ फरवरीसँ ६ मार्च २०२४ धरि आयोजित कयल गेल छल।
