चिराग पासवान बनाम पशुपति पारस हाजीपुरमे संभावना, महागठबंधनसँ पारसकेँ पांचो सीटक आस

पटना
*

एनडीए बिहारमे ४०टा लोकसभा सीटक घोषणा कयलक अछि। तहियासँ बिहारक राजनीतिमे हलचल तेज भऽ गेल अछि। लोजपा (राम विलास) केँ ई सीट भेटलाक बाद पशुपति कुमार पारस मोदी मंत्रिमंडलसँ इस्तीफा दऽ देलनि अछि। सीट बंटवारामे पारसक पार्टी राष्ट्रीय लोजपाकेँ एक्कहुटा सीट नहिं भेटल। पारस कहैत छथि जे हमरासभ संग अन्याय भेल अछि। सूत्रक अनुसार पशुपति पारस खेमा एक्कहुटा सीट नहिं भेटलासँ परेशान अछि। हुनकर पार्टी राजदक संपर्कमे अछि।

सूत्रसँ भेटल जानकारीक अनुसार पशुपति कुमार पारस बिहारमे एनडीएमे जगह नहिं भेटलाक बाद राजदक संपर्कमे आबि गेल छथि। पाँचो सीटक लेल चर्चा भऽ रहल अछि। संभावना अछि जे पशुपति कुमार पारस महागठबंधनसँ ओही सीट केर मांग कऽ रहल छथि जे चिराग पासवानक पार्टीकेँ हाजीपुर सहित एनडीएमे भेटल अछि। हुनका आशा अछि जे हुनका एहिमेसँ किछु सीट भेटि सकैत अछि। एहन मानल जा रहल अछि जे काका सेहो ओहि सीटक विरुद्ध अपन उम्मीदवार उतारि हुनका सीधा चुनौती देबय चाहैत छथि जतय चिराग अपन उम्मीदवार ठाढ़ करत। पशुपति कुमार पारस दिल्लीसँ पटना जा सकैत छथि आ एकरा लेल कोनो रास्ता खोजि सकैत छथि। ओ बुधदिन पटनामे प्रेस कॉन्फ्रेंस सेहो कऽ सकैत छथि। ओना राजद आ कांग्रेस पशुपति पारसक प्रवेशक संबंधमे एखन धरि कोनो बयान नहिं देलक अछि।

मुदा आब पारसकेँ हाजीपुरसँ चुनावी मैदानमे उतरय केर संभावना तेज भऽ गेल अछि। पशुपति पारस २०१९ मे हाजीपुर सीटसँ लोकसभा चुनाव जीति सांसद बनलाह। पारस चुनावी मैदानमे असगर जयताह वा गठबंधनमे शामिल हेताह, एक-दू दिनमे स्थिति स्पष्ट भऽ जायत। चिराग पासवानकेँ एनडीएमे इ सीट भेटल अछि।

लोक जनशक्ति पार्टी (रामविलास)क प्रमुख चिराग पासवान एहि बातसँ प्रसन्न छथि जे एनडीएमे सीट बंटवाराक बाद पार्टीकेँ पाँचटा सीट भेटल। एहि लेल प्रधानमंत्री नरेन्द्र मोदीकेँ धन्यवाद दैत ओ कहलनि जे हुनक पार्टीक सम्मानकेँ बरकरार राखल गेल आ हम विशेष रूपसँ लोजपा (राम विलास)क चिंता करबाक लेल हुनका धन्यवाद दैत छी। ओ कहलनि जे जखनि कोनो पैघ गठबन्धन बनैत अछि तखनि प्रत्येक पार्टीकेँ छोट-छोट समझौता करय पड़ैत अछि आ सबकेँ छोट-छोट त्याग करय पड़ैत अछि। पछिला लोकसभा चुनावमे भाजपा अपन सिटिंग पाँच सीट छोड़ि गठबन्धनकेँ मजबूत कयने छल। आइ आओर मजबूत रूप देल गेल अछि। जे संगी ओहि समय गठबंधनक हिस्सा नहिं छलाह ओ सेहो आइ हमरासभक सङ्ग छथि। ओ अपन दूटा सीटसँ चुनाव लड़बाक सम्भावनासँ इनकार कयलनि आ कहलनि जे पार्टी एहि पर अन्तिम निर्णय लेत। “पार्टीसँ हमरा जे जानकारी भेटि रहल अछि, ओकर अनुसार हम हाजीपुरसँ चुनाव लड़ब।” चिराग पासवान वर्तमानमे जमुई लोकसभा सीटसँ सांसद छथि।

जदयू नेता नीरज कुमार कहलनि, “भाजपाक केंद्रीय नेतृत्व घटक दलसँ संवाद कऽ रहल छल, एहिमे जेडीयू केर कोनो भूमिका नहिं छल। भाजपाक केन्द्रीय नेतृत्व चिराग पासवानक सङ्ग मिलिकऽ ई निर्णय लेलक। पशुपति कुमार पारसक की निर्णय अछि, ओ कतए जा रहल छथि, ओ मात्र वैऽह बता सकैत छथि। नीतीश कुमार सबके सम्मान केलखिन। ई भाजपा आ पशुपति कुमार पारसक बीचक मुद्दा अछि।