बिहारमे शिक्षा विभागक बैसारमे शामिल नहिं होबय वाला विश्वविद्यालयक बैंक खाताक संचालन पर रोक लगाबैत कुलपति आ कुलसचिवसँ स्पष्टीकरण मांगल गेल अछि।
स्पष्टीकरणमे इहो कहल गेल अछि जे अहाँक विरुद्ध प्राथमिकी किएक नहि दर्ज कयल जाय। शिक्षा विभागक स्पष्टीकरणमे कहल गेल अछि जे विभाग द्वारा २८ फरवरीकेँ परीक्षा कार्यक समीक्षा बैठक बजाओल गेल छल।
एहि बैसारमे भाग नहिं लेबाक लेल, विशेष रूपसँ लम्बित परीक्षाक संबंधमे पूर्ण रिपोर्ट नहिं देबाक लेल आ समय पर परीक्षा आयोजित करबामे आ परिणाम प्रकाशित करबामे विभागीय लोकसेवकक सहयोग करबामे विफल रहबाक लेल अहाँक विरुद्ध कानूनी कार्रवाई किएक नहिं शुरू कयल जाय। एहन स्थितिमे एहि बैसारमे अहाँक अनुपस्थिति एकटा गम्भीर विषय अछि। एहि पत्र जारी होयबाक तिथिसँ दू दिनक भीतर अपन स्पष्टीकरण दियौक।
पत्रमे कहल गेल अछि जे ताबत धरि अहाँक वेतन अगिला आदेश धरि स्थगित रहैत अछि। संगहि अगिला आदेश तक अहाँक विश्वविद्यालयक सभटा खाताक संचालन पर रोक लगायल जा रहल अछि।
उल्लेखनीय अछि जे शिक्षा विभाग २८ फरवरीकेँ एकटा बैसार बजौने छल, जाहिमे बिहारक सब विश्वविद्यालयक कुलपति, कुलसचिव, परीक्षा नियंत्रककेँ शामिल होबए लेल कहल गेल छल। राजभवनक आदेश पर एहि बैसारमे कोनो कुलपति उपस्थित नहिं छलाह। राजभवन एहि संबंधमे पहिने सभ विश्वविद्यालयकेँ निर्देश पठौने छल। शिक्षा विभाग द्वारा पूछल गेल स्पष्टीकरणसँ कामेश्वर सिंह दरभंगा संस्कृत विश्वविद्यालयक कुल सचिवकेँ बाहर राखल गेल अछि।
