हाड़मांस गलाबय वाला जाड़ आ ठंढक लहरि कए देखैत ब्राह्मण महासभा गाम गाम टोला मोहल्ला घुमि-घुमि जरूरतमंद लोकक बीच कम्बल वितरण कय रहल अछि। सिहौल, बारा आ शहरक विभिन्न वार्डमे घुमि कय जरूरतमंद लोककेँ पहचानि कम्बल बांटल गेल। एहि अवसर पर ब्राह्मण महासभा अध्यक्ष डब्बू मिश्र कहला जे ब्राह्मण महासभा एक गोट विचारधारा पर आधारित विचारवान आ क्रियाशील पारिवारिक संस्था अछि। संगहि ब्राह्मणक कर्म थिक दान लेब आ दान देव।ताहिसँ समाज कए हर वर्गक लोकक देखभाल होइत अछि। कोषाध्यक्ष रोशन मिश्रा कहलनि जे मनुष्य केर सेवा नारायण केर सेवा अछि। ब्राह्मण महासभाक युवा रोहित झा आ रोशन झा कहलनि जे समूचित पात्र आ विशेष खगता वाला कए पूर्ति करब असली मानव सेवा इयैह थिक।ओ कहलनि जे, महिषी, मुरादपुर सहित बहुतो गाममे जरूरतमंदकेँ बीच कम्बल बांटल गेल अछि। एहि उदात्त कार्यमे युवा लोकनि उत्साहपूर्वक भाग लेलनि। एहि अवसर पर अंशु मिश्र, टिंकू मैथिल, अंकुश, अभिषेक कुमार, हर्षवर्धन, मनीष सहित बहुत रास युवा उपस्थित छलाह। एहि कार्यक्रम केर अभिभावक लोकनि सेहो एहि उदात्त कार्यक सराहना केलनि। ई ज्ञात हो जे प्राकृतिक आपदा आ ठंढाक अवसर पर ब्राह्मण महासभा अपन सामाजिक दायित्वक निर्वहन बहुत नीक जकाँ क’ रहल अछि।संगहि गरीब लड़कीक आ कमजोर लोकक लेल विवाहक आयोजन निःशुल्क कयल जा रहल अछि।राहत वितरण, शिक्षा आ अन्य सामाजिक सरोकार पर काज भऽ रहल अछि। एहिसँ पूर्व वैश्विक आपदा कोरोनामे सेहो महासभा द्वारा समाजक सब वर्गक लोकक बीच राहत वितरण कयने छल।
