मालदीवक राष्ट्रपति मुइज्जू पाँच दिनक चीन यात्राक बाद वापिस आयल छथि। शनि दिन अपन देश घुरिते ओ एकटा पैघ बयान देलनि अछि। ओ कहलनि अछि जे कोनो देशकेँ हमर देशकेँ धमकी देबाक अधिकार नहिं अछि।
मालदीव आ भारतक बीच चलि रहल विवादक संबंधमे मुइज्जू ई बयान देलनि अछि। नव वर्षक प्रारम्भमे भारतक प्रधानमन्त्री नरेन्द्र मोदी लक्षद्वीपक दौरा कयलनि। एकर बाद मालदीवक नेता आ मंत्री लोकनि सोशल मीडिया पर नरेन्द्र मोदी आ भारतक जनताक विरुद्ध अपमानजनक टिप्पणी कयलनि। एकर बाद विवाद शुरू भेल।
मालदीव घुरलाक बाद मुइज्जू एकटा संवाददाता सम्मेलन कयलनि। ओ कहलनि “हम सभ छोट भऽ सकैत छी, मुदा ई अहाँकेँ हमरासभकेँ धमकी देबाक लाइसेंस नहिं दैत अछि। मुइज्जू चीन यात्रा पर छल। ओ चीनसँ आग्रह कयलनि जे ओ मालदीवमे बेसी पर्यटक पठाबथि आ एकरा लेल प्रयासकेँ तेज करथि।
मुइज्जू चीनमे कहलक “कोविडसँ पहिने चीन हमर (मालदीव) नंबर एक बाजार छल। हम चीनसँ आग्रह करैत छी जे ओ एहि स्थितिकेँ पुनः प्राप्त करबाक प्रयास तेज करय।”
प्रधानमंत्री नरेन्द्र मोदी २-३ जनवरीकेँ लक्षद्वीपक दौरा कयने छलाह। बादमे ओ लक्षद्वीपमे बितायल अपन समयक अपन चित्र आ वीडियो सोशल मीडिया पर साझा कयलनि। प्रधानमंत्री मोदी लोकसभसँ लक्षद्वीप अयबाक अपील कयलनि। एकर बाद लक्षद्वीपक चित्र आ वीडियो सोशल मीडिया पर शीर्ष ट्रेंड पर पहुँचि गेल। लक्षद्वीप गूगल सर्च पर ट्रेंड करय लागल।
मालदीवक सत्तारूढ़ दलक नेताकेँ ई बात नीक नहिं लागल। एकर कतेको नेता आ एतय धरि कि मालदीव सरकारक मंत्री लोकनि प्रधानमंत्री नरेन्द्र मोदी आ भारतक जनताक विरुद्ध अपमानजनक टिप्पणी कयलनि। एहिसँ सोशल मीडिया पर मालविदक विरुद्ध लोकक आक्रोश भड़कि गेल। लोक मालदीवक बहिष्कारक बात करय लागल। बहुतो लोक अपन मालदीव यात्रा रद्द करबाक घोषणा कयलनि।
