मालदीव सरकारक पूर्व मंत्री द्वारा पीएम मोदीक खिलाफ आपत्तिजनक टिप्पणीक मामिला एतेक बढ़ि गेल अछि जे राष्ट्रपति मोहम्मद मुइज्जूकेँ पदसँ हटयबाक मांग कयल जा रहल अछि, मालदीवक एकटा सांसद ई मांग कयलनि। मालदीवक कतेको अन्य शीर्ष नेता सेहो अपन सरकारक भारत-विरोधी रूखक तीक्ष्ण आलोचना कयलनि। गौरतलब अछि जे मालदीव सरकार पीएम मोदीक खिलाफ आपत्तिजनक टिप्पणी करयवला मंत्री सभकेँ हटा देलक अछि, मुदा तखनो मामिला शांत नहिं भऽ रहल अछि।
मालदीवक पार्टी द डेमोक्रेट्सक सदस्य अली अजीम मांग कयलनि अछि जे राष्ट्रपति मोहम्मद मुइजूकेँ सत्तासँ हटाबय लेल सभ आवश्यक कदम उठाओल जयबाक चाही। अली अजीम मालदीवक सबसँ पैघ विपक्षी दल एमडीपीसँ मोहम्मद मुइज्जूक विरुद्ध अविश्वास प्रस्ताव अनबाक माँग कयलनि अछि।
मालदीवक पूर्व रक्षा मंत्री आ विपक्ष एमडीपी केर नेता मारिया अहमद दीदी सेहो सत्तारूढ़ दलक आलोचना केलखिन । ओ कहलनि जे ‘भारत मालदीवक एकटा अजमायल मित्र अछि आ संकटक समयमे मालदीवक मदति करय लेल भारत सबसँ पहिने अबैत अछि। हमरासभक सदिखन इंडिया फर्स्ट नीति रहल अछि, मुदा वर्तमान सरकार भारतक सङ्ग मालदीवक सम्बन्धकेँ नष्ट कऽ रहल अछि।” ओ कहलनि जे ‘कोरोना महामारी, २००४ मे, सुनामीक समयमे सेहो भारत मालदीवक मदति करयवला पहिल देश छल। ‘
एकटा आओर विपक्षी नेता अहमद माहलूफ मालदीव सरकारकेँ चेतौनी देलनि अछि जे जँ भारतक सङ्ग चलि रहल तनावक कारण भारतीय पर्यटक मालदीवक बहिष्कार करैत रहलाह तँ मालदीवक अर्थव्यवस्थापर एकर पैघ प्रभाव पड़त। ओ कहलनि जे ई प्रभाव एतेक पैघ होयत जे एकरासँ उबरब कठिन भऽ जायत। वास्तवमे मालदीवक नेता सभक प्रधानमंत्री मोदी पर आपत्तिजनक टिप्पणीसँ भेल विवादक कारण हालक दिनमे पैघ संख्यामे पर्यटक मालदीवक दौरा रद्द कय देलक अछि। मालदीवक पुर्व राष्ट्रपति इब्राहिम सोलिह आ पूर्व विदेशमंत्री अब्दुल्ला शाहिद सेहो सरकारक आलोचना कयलक अछि।
