जखनि कि प्रधानमंत्री मोदी चुनाव पुर्व देने छलाह वचन
*
नई दिल्ली
*
पेट्रोलियम आ प्राकृतिक गैस मंत्री हरदीप सिंह पुरी बुधदिन कहलनि जे वर्तमानमे पेट्रोल आ डीजलक दाम कम करबाक कोनो प्रस्ताव नहिं अछि। कच्चा तेलक दाम एखन बहुत अस्थिर अछि। जखन कि प्रधानमंत्री नरेन्द्र मोदी राजस्थान विधानसभा चुनावमे वादा कयने छलाह जे चुनावक बाद पेट्रोल आ डीजलक दामक समीक्षा कयल जायत। राजस्थानमे तेलक दाम सेहो कम होयत। किएकि एतय देशक सबसँ महग पेट्रोल अछि।
ईंधनक दाममे कटौतीक विषयमे मीडिया रिपोर्टक अटकलकेँ खारिज करैत मंत्री कहलनि जे सरकारक सबसँ पैघ प्राथमिकता ऊर्जाक उपलब्धता बनेनाइ अछि।
ओ इहो कहलनि जे हालहिमे जखन कच्चा तेलक दाम आसमान छू रहल छल, तेल विपणन कंपनी – इंडियन ऑयल, बीपीसीएल आ एचपीसीएलकेँ भारी घाटा भेल छल।
मंत्री कहलनि जे ईंधनक दाममे कटौतीपर तेल विपणन कम्पनीसभक सङ्ग कोनो चर्चा नहिं भेल अछि आ ओ मूल्य निर्धारण पर सकारात्मक स्थिति चाहैत छथि।
मंत्री कहलनि जे भारत एकमात्र एहन देश अछि जतय हालक मासमे ईंधनक दाम कम भेल अछि।
आगू पुरी कहलनि “दक्षिण एशियाई देशसभमे पेट्रोल आ डीजलक दाममे लगभग ४०-८० प्रतिशतक वृद्धि भेल अछि। जँ पाश्चात्य औद्योगिक दुनियाकेँ देखब तँ दाम बढ़ि गेल अछि, मुदा भारतमे दाम कम भऽ गेल अछि।
ओ कहलनि “दूरदर्शी नेतृत्वक कारणेँ हम ई करबामे सक्षम छी।” केन्द्रीय उत्पाद शुल्कमे दू बेर कटौती कयल गेल छल, नवम्बर २०२१ आ मई २०२२ मे आ हम २०२३ मे एकरा जारी रखलहुँ।
