एक करोड़ परिवारकेँ उद्यमसँ जोड़बाक लक्ष्य, 7 हजार लाभुककेँ पहिल किस्त
पटना । समदिया
मुख्यमंत्री सम्राट चौधरी मुख्यमंत्री उद्यमी योजनाक अन्तर्गत 7 हजार चयनित लाभुककेँ किस्तक राशि हस्तान्तरित कएलनि। एहि अवसर पर राज्यक सभ जिलामे स्थापित एमएसएमई केन्द्र सभक उद्घाटन सेहो कएल गेल।
मुख्यमंत्री कहलनि जे बिहारक 1 करोड़ परिवारकेँ उद्यमिता आ आर्थिक स्वावलम्बनसँ जोड़ब सरकारक प्राथमिकता अछि। रोजगारक अवसर राज्येमे बढ़ेबाक उद्देश्यसँ उद्योग, शिक्षा, आधारभूत संरचना आ ऊर्जाक क्षेत्रमे आगामी पाँच वर्षमे व्यापक कार्य करबाक बात कहलनि।
सरकारक अनुसार, मुख्यमंत्री उद्यमी योजनाक विभिन्न श्रेणीमे 44,742 लाभुककेँ करीब 3,339.63 करोड़ टाका वितरित करबाक तैयारी अछि। एहिमे एससी-एसटी, अति पिछड़ा, महिला, युवा आ अल्पसंख्यक उद्यमी योजना शामिल अछि। एखन 7 हजार लाभुककेँ राशि देल गेल अछि।
सम्राट चौधरी कहलनि जे बिहारमे बनल उत्पादकेँ सरकारी खरीदमे प्राथमिकता देबाक दिशामे सेहो काज भऽ रहल अछि। आगामी पाँच वर्षमे उद्योग लेल 20 हजार मेगावाट बिजली उपलब्ध करबाक लक्ष्य अछि। पर्यटन क्षेत्रमे 20 महत्वपूर्ण स्थान पर रोप-वे निर्माण आ कृषि फीडरकेँ सौर ऊर्जासँ जोड़बाक योजना सेहो बताओल गेल।
कार्यक्रममे उद्योग सह खेल मंत्री श्रेयसी सिंह, अल्पसंख्यक कल्याण मंत्री जमां खान, पिछड़ा वर्ग एवं अतिपिछड़ा वर्ग कल्याण मंत्री रमा निषाद, एससी-एसटी कल्याण मंत्री लखेन्द्र कुमार रौशन, मुख्य सचिव प्रत्यय अमृत सहित अधिकारी आ उद्यमी उपस्थित छलाह।
