जंतर-मंतर पर विपक्षी सांसदक प्रदर्शन, राहुल गांधीकेँ लऽ जा रहल बस पंचर
नई दिल्ली । समदिया
मुख्य चुनाव आयुक्त ज्ञानेश कुमारक इस्तीफा, एसआईआर आ ‘वोट चोरी’क आरोपकेँ लऽ कऽ कांग्रेसक नेतृत्वमे इंडिया गठबंधनक सांसद बुधदिन जंतर-मंतर पर प्रदर्शन करय लेल पहुँचलाह। राहुल गांधी कहलनि जे विपक्षी सांसदकेँ निर्वाचन आयोगसँ भेंट नहि करऽ देल गेल।
जंतर-मंतर दिसि बढ़ैत प्रदर्शनकारी सांसदकेँ पुलिस रोकि हिरासतमे लेब शुरू कऽ देलक। कांग्रेस सांसद प्रियंका गांधी वाड्रा अस्वस्थ भेला पर सड़क पर बैसि गेलीह, जकर बाद हुनका सेहो हिरासतमे लेल गेल।
एहि बीच राहुल गांधीकेँ लऽ जा रहल पुलिस बसकेँ कांग्रेस कार्यकर्तासभ पंचर कऽ देलनि। एकरा बाद जंतर-मंतर पर पुलिस आ प्रदर्शनकारीक बीच तनाव बढ़ि गेल। राजद सांसद मनोज कुमार झा पुलिस कार्रवाईकेँ ‘क्रूरताक पराकाष्ठा’ बतौलनि।
एहिसँ पहिने मंगलदिन राहुल गांधीक नेतृत्वमे विपक्षी सांसद आकाशवाणी भवन लग करीब आठ घंटा धरना देने छलाह। रातिमे पुलिस राहुल गांधी आ प्रियंका गांधी सहित किछु नेतासभकेँ हिरासतमे लेने छल।