सारणमे बाढ़िक कहर, 236 गाम प्रभावित, 4.60 लाख लोक संकटमे
छपरा । समदिया
सारण जिलामे बाढ़िक पानि धीरे-धीरे घटि रहल अछि, मुदा छह प्रखंडक 42 पंचायतक 236 गाममे एखनहुँ जनजीवन प्रभावित अछि। मकेरमे एनएच-722 पर करीब आधा फीट पानि रहबाक कारण आवागमन प्रभावित अछि। कतेको गामक सड़क कटि गेल अछि आ दर्जनों घर क्षतिग्रस्त भेल अछि।
आपदा प्रबंधन विभागक अनुसार बाढ़िसँ 4 लाख 60 हजार 963 लोक आ 1 लाख 4 हजार 43 परिवार प्रभावित भेल अछि। करीब 74 हजार 737 लोक सुरक्षित स्थान दिसि पलायन कएने छथि। राहत-बचाव लेल 128 नाव चलाओल जा रहल अछि।
प्रभावित क्षेत्रमे संक्रमण रोकबाक लेल ब्लीचिंग पाउडरक छिड़कावक संग राहत, स्वास्थ्य, पेयजल, पशु चिकित्सा आ खाद्यान्नक व्यवस्था जारी अछि। 54 चिकित्सा शिविरमे 14 हजार 12 मरीजक उपचार कएल गेल अछि।
प्रभावित लोकक लेल 133 सामुदायिक रसोई संचालित अछि, जतय 4 लाख 51 हजार 538 लोककेँ भोजन उपलब्ध कराओल गेल अछि। राहत कार्यक तहत 55 हजार 718 पॉलीथिन शीट वितरित कएल गेल अछि। बच्चासभक पोषण लेल 254 आंगनबाड़ी केंद्र सेहो संचालित अछि।
