बासठ करोड़क पुलिस वाहन खरीद पर उठल सवाल, विपक्ष कहलक – आंदोलन दबेबाक तैयारी
पटना । समदिया
बिहार सरकार 30 वाटर कैनन आ 86 वज्र वाहन खरीदत। मुख्यमंत्री सम्राट चौधरीक अध्यक्षतामे 30 सितंबरकेँ भेल कैबिनेट बैठकमे एहि लेल 62 करोड़ 52 लाख रुपैयाक प्रशासनिक स्वीकृति देल गेल। सरकार एकरा कानून-व्यवस्था मजबूत करबाक आवश्यकता बतौलक, मुदा विपक्ष आ छात्र नेतासभ एहि निर्णय पर सवाल उठौलनि।
30 वाटर कैनन पर 26.40 करोड़ आ 86 वज्र वाहन पर 36.12 करोड़ रुपैया खर्च होयत। भाजपा प्रवक्ता प्रेम रंजन पटेलक अनुसार प्रदर्शन, भीड़ नियंत्रण, दंगा, सड़क जाम, आपात स्थिति, पर्व-त्योहार, चुनाव आ वीआईपी आवागमनमे पुलिसकेँ एहि संसाधनक आवश्यकता पड़ैत अछि।
विपक्षक आरजेडी प्रवक्ता एजाज अहमद आरोप लगौलनि जे सरकार छात्र, युवा आ शिक्षकक मांगक समाधान करबाक बदला आंदोलन नियंत्रित करबाक तैयारी कऽ रहल अछि। छात्र नेता सौरभ कुमार सेहो कहलनि जे भर्ती, रोजगार आ परीक्षा संबंधी समस्याक समाधान जरूरी अछि, वाटर कैनन आ वज्र वाहन नहि।
सरकारक तर्क अछि जे ई खरीद कुनो खास आंदोलनकेँ ध्यानमे राखि नहि, बल्कि पुलिसक सामान्य आवश्यकता आ कानून-व्यवस्थाक दृष्टिसँ कएल जा रहल अछि। मुदा एहि निर्णयकेँ लऽ कऽ सरकार आ विपक्षक बीच राजनीतिक बहस तेज भऽ गेल अछि।
