मुजफ्फरपुरमे तटबंध टूटल, सैकड़ों एकड़ खेत जलमग्न
मुजफ्फरपुर । समदिया
मड़वन प्रखंडमे रविक भोर तिरहुत बैतरणी नहरक करीब 40 फीट तटबंध टूटि गेलासँ आसपासक सैकड़ों एकड़ खेतमे पानि पसैर गेल। रक्सा बाजार लग तटबंध टूटलाक बाद नहरक पानि तेज धारमे खेत आ चबड़ दिस बहए लागल। एहिसँ ग्रामीणमे अफरा-तफरी मचि गेल।
ग्रामीणक अनुसार, पानिक बहावसँ खेत जलमग्न भऽ गेल अछि, मुदा प्रारंभिक जानकारीक अनुसार फसलक पैघ क्षतिक सूचना नहि अछि। आसपासक बाट पर पानि जमा भेलासँ आवागमन सेहो प्रभावित भेल अछि।
ग्रामीण सभ तटबंध प्राकृतिक रूपसँ टूटबाक बदला काटल गेलाक आशंका व्यक्त कएलनि। स्थानीय लोकक कहब अछि जे तटबंध पर काटल गेलाक निशान देखाइ पड़ैत अछि। ग्रामीणक अनुसार, एहि इलाकामे पछिला एक वर्षमे करीब तीन बेर तटबंध प्रभावित भऽ चुकल अछि।
सूचना भेटलाक बाद प्रशासनक टीम घटनास्थल पर पहुँचि स्थिति केर जायजा लेलनि। पश्चिमी अनुमंडल पदाधिकारी स्नेहा कुमारी कहलनि जे स्थानीय लोकक सूचनाक आधार पर तटबंधमे छेड़छाड़ अथवा काटबाक आशंका अछि। मामिलाक जांच कएल जा रहल अछि। पानिक बहाव कम भेलाक बाद तटबंधक मरम्मतिक काज शुरू कराओल जाएत।
