भारत-नेपाल सीमापर घुसपैठ आ तस्करी रोकबाक लेल केंद्र-बिहार मिलि कऽ करत काज
पटना । समदिया
भारत-नेपाल सीमापर सुरक्षा व्यवस्था मजबूत करबाक संगहि घुसपैठ, फर्जी दस्तावेज, नकली नोट आ मादक पदार्थक तस्करी सहित अन्य आपराधिक गतिविधि पर रोक लगाबय लेल केंद्र आ बिहार सरकार मिलि कऽ काज करत। मुख्यमंत्री सम्राट चौधरी शनिदिन अधिकारी सभकेँ सीमावर्ती क्षेत्रमे लगातार निगरानी आ संबंधित एजेंसी सभक बीच बेहतर समन्वय सुनिश्चित करबाक निर्देश देलनि।
मुख्यमंत्री सचिवालयमे सम्राट चौधरीक अध्यक्षतामे भारत-नेपाल सीमासँ जुड़ल विषय पर उच्चस्तरीय समीक्षा बैठक भेल। बैठकमे केंद्रीय गृह राज्यमंत्री नित्यानंद राय आ उपमुख्यमंत्री विजय कुमार चौधरी सेहो उपस्थित छलाह। एहि दौरान सीमा सुरक्षा, सीमा प्रबंधन, कानून-व्यवस्था आ अवैध गतिविधिक रोकथाम पर विस्तृत प्रस्तुतीकरण देल गेल।
मुख्यमंत्री कहलनि जे भारतक सुरक्षा सर्वोच्च जिम्मेदारी अछि। एसएसबी, बिहार पुलिस आ केंद्रीय एजेंसी सभकेँ आपसी समन्वयसँ काज करबाक निर्देश देलनि। सीमावर्ती बैंकमे नकली नोट पहिचानबाक मशीन उपलब्ध कराबय, संदिग्ध वित्तीय लेन-देन आ फर्जी म्यूल बैंक खाताक पहिचान कऽ नियमानुसार कार्रवाई करबाक लेल सेहो कहलनि।
मुख्यमंत्री ‘नशा मुक्त भारत 2029’क लक्ष्यक उल्लेख करैत सीमा क्षेत्रसँ मादक पदार्थक आवाजाही रोकबाक लेल प्रभावी कार्रवाई पर जोर देलनि। सीमावर्ती जिलाक जिलाधिकारी आ पुलिस अधिकारीक केंद्रीय सुरक्षा एवं जांच एजेंसीक संग नियमित मासिक समन्वय बैठक करबाक निर्देश देलनि।
बैठकमे सीमावर्ती क्षेत्रमे गैर-पंजीकृत धार्मिक स्थल सभक पहिचान कऽ कानूनक अनुसार कार्रवाई आ सीमावर्ती इलाकामे शिक्षा सुविधा बेहतर करबाक विषय पर सेहो चर्चा भेल। मुख्यमंत्री संबंधित एजेंसी सभकेँ सूचना-साझाकरण, सतर्कता आ समन्वित कार्रवाई मजबूत रखबाक निर्देश देलनि।
