पीएम मोदी राष्ट्रपति पुतिनकेँ भेंट कऽ देलनि ‘तिरुक्कुरल’क रूसी अनुवाद

कहलनि—तिरुवल्लुवरक शाश्वत ज्ञान भाषा आ सीमासँ परे

नई दिल्ली । समदिया

प्रधानमंत्री नरेंद्र मोदी शुक्रदिन भारत मंडपममे रूसक राष्ट्रपति व्लादिमीर पुतिनक संग भेटक शुरुआत महान तमिल कवि-दार्शनिक तिरुवल्लुवरक अमर कृति ‘तिरुक्कुरल’क रूसी अनुवादक प्रति भेंट कऽ कएलनि। मोदी सोशल मीडिया पर कहलनि जे ‘तिरुक्कुरल’ तिरुवल्लुवरक शाश्वत ज्ञानकेँ भाषा आ सीमासँ परे पहुँचेबाक माध्यम अछि।

तमिल साहित्यक एहि प्रसिद्ध ग्रंथमे 1,330 कुरल (दोहा) अछि। ई सदाचार, समृद्धि आ प्रेमक शिक्षा दैत अछि आ अपन सार्वभौमिक एवं धर्मनिरपेक्ष दृष्टिक लेल विश्वभरिमे प्रसिद्ध अछि। एकर रूसी अनुवाद नैरा म्कर्तच्यान कएने छथि। ‘तिरुक्कुरल’सँ प्रसिद्ध रूसी साहित्यकार लियो टॉल्स्टॉय सेहो प्रभावित भेल छलाह।

भेटवार्तामे रूसक विदेश मंत्री सर्गेई लावरोव, प्रथम उप-प्रधानमंत्री डेनिस मंतुरोव सहित दुनू देशक वरिष्ठ अधिकारी उपस्थित छलाह। दुनू नेतामे राजनीति, अर्थव्यवस्था, रक्षा, ऊर्जा, अंतरिक्ष, आवागमन आ जन-जनक संबंध सहित विभिन्न क्षेत्रमे सहयोगक प्रगतिक समीक्षा भेल।

वार्तामे 2030 धरि भारत-रूस द्विपक्षीय व्यापारकेँ 100 अरब डॉलर धरि पहुँचाबय, रेल-सुरंग निर्माणमे औद्योगिक सहयोग बढ़ाबय, इस्पात मूल्य शृंखला विकसित करय आ भारतीय कंपनिक लेल रूसी बाजारमे अवसर बढ़ेबाक विषय पर सेहो चर्चा भेल।

पुतिन 12-13 सितंबरकेँ नई दिल्लीमे होमयवला 18म ब्रिक्स शिखर सम्मेलनमे भाग लेबाक लेल भारत पहुँचल छथि। ई यात्रा भारत-रूसक बीच जारी उच्चस्तरीय संपर्कक महत्वपूर्ण कड़ी मानल जा रहल अछि।