बिहार कांग्रेसक 29 नेताकेँ कारण बताउ नोटिस, 72 घंटामे जवाबक निर्देश

पटना । समदिया

बिहार प्रदेश कांग्रेसक अनुशासन समिति पार्टी विरोधी गतिविधि आ अनुशासनहीनताक आरोपमे 29 नेताकेँ कारण बताउ नोटिस जारी कयलक अछि। 8 सितंबरकेँ नई दिल्लीमे अखिल भारतीय कांग्रेस कमिटी (एआइसीसी)क कार्यालय लग प्रदेश कांग्रेस नेतृत्वक विरोधमे आयोजित धरना-प्रदर्शनमे शामिल भेलाक कारण ई कार्रवाई कएल गेल अछि।

प्रदेश कांग्रेस अनुशासन समितिक अध्यक्ष कपिलदेव प्रसाद यादव द्वारा जारी नोटिसमे संबंधित नेता सभसँ 72 घंटाक भीतर लिखित स्पष्टीकरण मांगल गेल अछि। हुनका सभकेँ ई बताबय पड़तनि जे पार्टीक नियमक अनुसार हुनका विरुद्ध अनुशासनात्मक कार्रवाई किएक नहि कएल जाय।

समिति प्रदर्शनमे सक्रिय भागीदारीकेँ पार्टीक नीति, अनुशासन आ निर्देशकेँ उल्लंघन बतबैत एकरा घोर अनुशासनहीनता मानलक अछि। निर्धारित समयमे जवाब नहि भेटलि अथवा स्पष्टीकरण असंतोषजनक भेल तँ पार्टीक नियमक अनुसार एकतरफा कार्रवाई कएल जा सकैत अछि।

नोटिस पाबयवला 29 नेता सभमे पूर्व विधायक अनिल सिंह, पूनम देवी, विधूशेखर पांडेय, भारत भूषण दूबे, सत्येंद्र यादव आ मृत्युंजय सिंह प्रमुख छथि। प्रदेश कांग्रेसमे पहिनेसँ चलि रहल आंतरिक खींचतानक बीच एहि कार्रवाईसँ विवाद आरो गहिंर होयबाक संभावना अछि।