पीएम मोदी नवसारीमे कहलनि – ‘आराम हराम अछि’ केवल नारा नहि, जनसेवा हमर संकल्प

नवसारी । समदिया

प्रधानमंत्री नरेंद्र मोदी मंगलदिन गुजरातक नवसारीमे आयोजित जनसभामे कहलनि जे ‘आराम हराम अछि’ केवल नारा नहि, बल्कि भाजपा कार्यकर्तासभ दिन-राति लोकक सेवामे जुटल छथि। हुनकर एकमात्र उद्देश्य 140 करोड़ देशवासीसभक कल्याण अछि।

पीएम मोदी कहलनि जे “सत्ता सेवाक लेल, संगठन सेवाक लेल आ पद सेहो सेवाक लेल अछि।” ओ गुजरातक मुख्यमंत्रीक रूपमे अपन कार्यकालकेँ स्मरण करैत बेटीसभक शिक्षाक लेल गाम-गाम कएल गेल जागरूकता अभियानक चर्चा कएलनि।

रेहड़ी-पटरी आ छोट दुकानदारसभ लेल ऋण सुविधाक उल्लेख करैत ओ कहलनि जे सरकार बिना गिरवी आ गारंटी ऋणक व्यवस्था कएलक। एहि योजनासँ लाखों लोक लाभान्वित भेल छथि आ समय पर ऋण चुकौनिहार लोककेँ 30 हजारसँ 50 हजार टाका धरि आगाँ ऋण भेटल अछि।

पीएम मोदी नवसारीमे स्थापित पार्टीक नव कार्यालयकेँ जरूरतमंद लोकसभक लेल सहाराक केन्द्र बनेबाक आह्वान कएलनि। आगामी पर्वसभक चर्चा करैत ओ स्वच्छता अभियान पर जोर देलनि।

गुजरातक मुख्यमंत्री भूपेंद्र पटेल कहलनि जे पीएम मोदीक नेतृत्वमे विकास आ जनसेवा भाजपा कार्यसंस्कृतिक मुख्य आधार बनल अछि। एहि अवसर पर प्रधानमंत्री वडोदरामे 35 हजार करोड़ टाकासँ बेसीक विकास परियोजनाक उद्घाटन आ शिलान्यास सेहो कएलनि।