बाढ़ पीड़ितक संग भोजन केलनि सीएम सम्राट चौधरी, मृतकक परिजनकेँ चार लाखक चेक

वैशाली । समदिया

बिहारक बाढ़ि प्रभावित वैशाली आ सारण जिलाक राहत कार्यक निरीक्षण लेल मुख्यमंत्री सम्राट चौधरी सोमदिन हाजीपुर आ सोनपुर पहुँचलाह। सोनपुरक राहत शिविरमे मुख्यमंत्री बाढ़ि पीड़ितसभसँ भेट कऽ सुविधा सभक जानकारी लेलनि आ सामुदायिक किचनमे पहुँचि भोजन व्यवस्थाक निरीक्षण केलनि। एहि दौरान ओ बाढ़ि पीड़ितसभकेँ अपन हाथसँ भोजन खुआओलनि आ हुनका सभक संग स्वयं सेहो भोजन केलनि।

मुख्यमंत्री कहलनि जे आपदाक एहि समयमे सरकार बाढ़ि पीड़ितसभकेँ हरसंभव सहायता उपलब्ध करा रहल अछि। राहत शिविरमे रहनाइ, भोजन, पेयजल आ स्वास्थ्य सुविधाक संग बच्चासभक पढ़ाइ प्रभावित नहि होए, ताहि लेल सेहो व्यवस्था कएल जा रहल अछि।

ओ कहलनि जे नदीक जलस्तर लगातार घटि रहल अछि आ आगामी दू-तीन दिनमे बाढ़िक स्थिति आरो सुधरबाक संभावना अछि। गंगाक जलस्तर करीब 17-18 सेंटीमीटर घटल अछि। मुख्यमंत्री अधिकारीसभकेँ राहत-बचाव कार्यमे पूरा तत्परता राखबाक आ पीड़ितसभकेँ कोनो प्रकारक कठिनाइ नहि होय, एकर निर्देश देलनि।

डूबलासँ मृत व्यक्तिक परिजनकेँ चारि लाखक सहायता

हाजीपुरक जढ़ुआ स्थित राहत शिविरमे मुख्यमंत्री आंगनबाड़ी केंद्रक निरीक्षण कऽ बच्चासभसँ सेहो भेंट केलनि। एहि दौरान बाढ़िमे डूबलासँ मृत्यु भेल करीब आधा दर्जन व्यक्तिक आश्रितसभकेँ चारि-चारि लाख रुपयाक सहायता राशिक चेक प्रदान कएलनि। बाढ़ पीड़ित परिवारसभक बीच राहत सामग्री सेहो बाँटल गेल।

मुख्यमंत्री बाढ़िक स्थायी समाधानक आवश्यकता पर जोर दैत कहलनि जे एहि संबंधमे केंद्रीय जल आयोगसँ बातचीत भेल अछि। गंगाक पानि नियंत्रित करबाक लेल दीर्घकालीन योजना पर काज भऽ रहल अछि, जाहिसँ प्रत्येक वर्ष बाढ़िसँ लोकसभकेँ होबयवला परेशानी कम कएल जा सकय।

निरीक्षणक दौरान जल संसाधन मंत्री, सारणक जिलाधिकारी, पुलिस अधीक्षक सहित वरिष्ठ प्रशासनिक अधिकारी उपस्थित छलाह।