छात्रक न्याय लेल लड़ाई जारी रखबाक घोषणा, तेजस्वी यादवक नेतृत्वमे राजदक लोकभवन मार्चमे हंगामा

पटना । समदिया

बिहारमे नीट पेपर लीक, एके-47 सँ फायरिंग, लंबित परीक्षा आ भर्ती प्रक्रिया, बेरोजगारी तथा कानून-व्यवस्थाक मुद्दा लऽ कऽ नेता प्रतिपक्ष तेजस्वी यादवक नेतृत्वमे राष्ट्रीय जनता दल (राजद) द्वारा निकालल गेल लोकभवन मार्चक दौरान भारी हंगामा भेल। जेपी गोलंबरसँ शुरू भेल ई मार्च लोकभवन दिसि बढ़ि रहल छल, मुदा पुलिस प्रदर्शनकारी नेता आ कार्यकर्तासभकेँ इनकम टैक्स गोलंबरक समीप रोकि देलक। एहिक क्रममे पुलिस वाटर कैननक प्रयोग कयलक आ तेजस्वी यादवकेँ हिरासतमे लऽ लेल गेल।

वाटर कैननक प्रयोग पर तेजस्वीक सरकार पर हमला

तेजस्वी यादवक नेतृत्वमे भारी संख्यामे राजद कार्यकर्ता हाथमे तिरंगा लऽ कऽ लोकभवन दिसि पैदल मार्च कऽ रहल छलाह। प्रदर्शनकारीसभकेँ तितर-बितर करबाक लेल पुलिस वाटर कैननक प्रयोग कयलक। एहि पर तेजस्वी यादव सम्राट सरकार पर निशाना साधैत कहलनि जे ई कार्रवाई सरकारक आदेश पर भेल अछि।

तेजस्वी यादव कहलनि, “वाटर कैननक प्रयोगसँ कोनो फर्क पड़ऽ वाला नहि अछि। जनता आब जागि चुकल अछि आ सड़क पर उतरि गेल अछि। आब सरकारकेँ झुकबे पड़तैक। एना काज नहि चलत।”

तेजस्वी यादव हिरासतमे लेल गेलाह

प्रदर्शनक दौरान पुलिस तेजस्वी यादवकेँ हिरासतमे लऽ कऽ गाड़ीमे बैसा देलक। एहि दौरान कार्यकर्तासभ जमि कऽ विरोध आ हंगामा केलनि। मार्चमे तेजस्वी यादवक पैघ बहिन आ लोकसभा सांसद मीसा भारती सेहो उपस्थित रहलीह।

हिरासतमे लेल जएबाक बाद तेजस्वी यादव कहलनि जे राजदक मार्च राजभवन धरि जएबाक छल, मुदा पुलिस इनकम टैक्स गोलंबरक समीप रोकि देलक। ओ कहलनि जे राजद सरकारक विरुद्ध संघर्ष जारी राखत आ जेलसँ डरयवाला नहि अछि।

तेजस्वी यादव कहलनि, “हम छात्रसभक हक आ अधिकार लेल, बेरोजगारी समाप्त करबाक लेल, पेपर लीक रोकबाक लेल, पारदर्शी परीक्षा, नीक शिक्षा, नीक स्वास्थ्य आ बिहारकेँ आगाँ बढ़ेबाक लेल सदिखन आवाज उठबैत रहब आ लड़ैत रहब। जाबति धरि छात्रसभक संग न्याय नहि भऽ जाइत अछि, ताबत धरि ई लड़ाई जारी रहत।”

मीसा भारतीक सरकार पर गंभीर आरोप

राजद सांसद मीसा भारती कहलनि जे छात्रसभक संग भेल कथित अन्यायक घटना केँ 20-25 दिन बीति गेल, मुदा सरकार एखन धरि नहि जागल अछि। ओ एके-47 फायरिंगक मामिलामे सेहो सरकारसँ जवाब मंगलीह।

मीसा भारतीक अनुसार, “सुप्रीम कोर्टमे बिहार सरकार स्वयं मानि चुकल अछि जे एके-47क प्रयोग भेल। एहेन स्थितिमे ई सवाल उठैत अछि जे प्रदर्शनक दौरान एके-47 लऽ कऽ जाएबाक अनुमति के देलक ?”

ओ आगाँ कहलनि जे जँ जिलाधिकारी आ पुलिस अधीक्षक स्तरसँ एहेन अनुमति देल गेल छल, तँ संबंधित अधिकारीसभ पर कार्रवाई होयबाक चाही। ओ बिहार सरकार पर युवा आ आमजनक हितक उपेक्षा करबाक आरोप सेहो लगौलनि।

मनोज झाक सवाल—एके-47 केर अनुमति के देलक ?

राजद सांसद मनोज कुमार झा कहलनि जे परीक्षा लीक, बेरोजगारी आ युवासभक भविष्यक सवाल बिहारमे गंभीर मुद्दा बनि गेल अछि। ओ कहलनि जे एहि समस्याक समाधानक मांग लऽ कऽ ई मार्च निकालल गेल अछि।

मनोज झा कहलनि, “छात्र आ युवा सभठाम आक्रोशित छथि, विशेष रूपसँ बिहारमे। परीक्षा लीक आब एकटा परंपरा जकाँ बनि गेल अछि आ बेरोजगारीक मारि युवा नहि सहि पा रहल छथि। समाधान लेल ई मार्च निकालल गेल अछि। एके-47क प्रयोगक अनुमति के देलक—ई सवाल एखनहुँ कायम अछि।”

ओ कहलनि, “जखनी जनता अपन शक्ति देखबैत अछि तँ परिवर्तन होइत अछि। बिहारक युवा हार मानयवाला नहि छथि।”

राजदक लोकभवन मार्चक माध्यमसँ नेता प्रतिपक्ष तेजस्वी यादव सरकार पर छात्रहित, परीक्षा व्यवस्था, बेरोजगारी आ कानून-व्यवस्थाक मुद्दासँ दबाव बढ़ेबाक प्रयास केलनि। तेजस्वी यादव स्पष्ट रूपसँ घोषणा केलनि जे छात्रसभक संग न्याय नहि होएबा धरि हुनकर संघर्ष जारी रहत।