अटल बिहारी वाजपेयीजीक पुण्यतिथि पर पीएम मोदी सहित केंद्रीय मंत्रीगणक श्रद्धांजलि

नई दिल्ली । समदिया

पूर्व प्रधानमंत्री आ भारत रत्न अटल बिहारी वाजपेयीक पुण्यतिथिक अवसरपर प्रधानमंत्री नरेंद्र मोदी सहित केंद्र सरकारक अनेक वरिष्ठ मंत्री हुनका श्रद्धापूर्वक स्मरण करैत श्रद्धांजलि अर्पित कयलनि।

प्रधानमंत्री नरेंद्र मोदी सोशल मीडिया पोस्टमे कहलनि जे अटलजी अद्भुत दूरदर्शितासँ सम्पन्न असाधारण राजनेता छलाह, जे अपन सम्पूर्ण जीवन देशक सेवामे समर्पित कऽ देने छलाह। हुनकर विचार आ प्रयास अनेक पीढ़ीकेँ प्रेरित करैत रहल अछि। सुशासन आ जनकल्याणपर हुनकर जोर सदैव मार्गदर्शन करैत रहत।

केंद्रीय गृहमंत्री अमित शाह अटलजीकेँ देशभक्त राजनेता बतबैत कहलनि जे हुनकर जीवनक प्रत्येक क्षण राष्ट्रसेवामे समर्पित छल। परमाणु परीक्षण आ कारगिल युद्धक माध्यमसँ भारतक सामरिक शक्ति प्रदर्शित करबाक संग-संग मूल्य-आधारित राजनीतिमे अन्त्योदय आ सुशासनक अवधारणाकेँ जमीनपर उतारबामे हुनकर महत्वपूर्ण योगदान रहल।

रक्षा मंत्री राजनाथ सिंह कहलनि जे अटलजी अपन विचार आ कार्यसँ भारतीय लोकतंत्रकेँ समृद्ध कयलनि। हुनकर राजनीति राष्ट्रहित आ जनसेवाकेँ केन्द्रमे राखि कऽ चलैत छल। हुनकर नेतृत्वमे भारत सामरिक शक्ति, आर्थिक विकास आ आधारभूत संरचनाक क्षेत्रमे महत्वपूर्ण प्रगति कयलक।

सड़क परिवहन आ राजमार्ग मंत्री नितिन गडकरी अटलजीकेँ करोड़ों कार्यकर्ताक प्रेरणास्रोत बतबैत हुनका कोटि-कोटि नमन कयलनि। हुनका अनुसार अटलजीक जीवन विचारधारा, सिद्धान्त आ राष्ट्रसेवाक प्रति समर्पणक आदर्श रहल।

लोकसभा अध्यक्ष ओम बिरला कहलनि जे अटलजी भारतीय राजनीतिमे एकटा युगपुरुष छलाह। हुनकर व्यक्तित्वमे राष्ट्रनिष्ठा, लोकतांत्रिक मूल्य, संवेदनशीलता आ अद्भुत वक्तृत्वक अनूठा संगम छल। हुनकर दीर्घ संसदीय जीवन, प्रखर वक्तृत्व, पत्रकारिता आ कविताक क्षेत्रमे योगदान सदैव स्मरणीय रहत।

केंद्रीय मंत्री मनोहर लाल अटलजीकेँ ‘नव भारतक स्वप्नद्रष्टा’ आ सुशासनक आदर्श प्रतिमान बतौलनि। केंद्रीय मंत्री अर्जुन राम मेघवाल हुनका राष्ट्रसेवा, लोकतांत्रिक मूल्य आ राजनीतिक शुचिताक आदर्श पुरुष कहैत श्रद्धांजलि देलनि।

संसदीय कार्य मंत्री किरण रिजिजू कहलनि जे अटलजीक प्रेम आ आशीर्वादकेँ ओ सदैव स्मरण करताह। विदेश मंत्री एस. जयशंकर सेहो अटलजीक भारतक सुरक्षा, अर्थव्यवस्था आ कूटनीतिक क्षेत्रमे देल गेल अमूल्य योगदानकेँ स्मरण करैत श्रद्धांजलि अर्पित कयलनि।

अटल बिहारी वाजपेयीजीक जीवन राष्ट्रसेवा, लोकतांत्रिक मर्यादा, सुशासन, संवेदनशीलता आ राष्ट्रहितकेँ सर्वोपरि रखबाक प्रेरणादायी उदाहरणक रूपमे सदैव स्मरण कएल जाइत रहत।