बलूचिस्तानमे तनाव चरम पर, खुजदारमे लॉकडाउनसँ जनजीवन प्रभावित

दिल्ली । समदिया

पाकिस्तानक बलूचिस्तान प्रांतमे सुरक्षा स्थिति लगातार गंभीर होइत जा रहल अछि। सैन्य अभियान, उग्रवादी हमला, नागरिक हताहतक दाबी आ विरोध-प्रदर्शनक बीच तनाव बढ़ल अछि। एहि बीच खुजदार शहरमे पुलिस अगिला आदेश धरि लॉकडाउन लागू कऽ देलक अछि। नागरिककेँ जरूरी काज छोड़ि घरसँ बाहर निकलए पर रोक लगाओल गेल अछि।

बलूचिस्तानमे स्थानीय स्तर पर संसाधनक असमान वितरण, लापता लोकक मामिला आ सैन्य कार्रवाइक विरोधमे नमहर समयसँ असंतोष देखल जा रहल अछि। हालक घटनाक्रमसँ ई नाराजगी आर बढ़बाक बात कहल जा रहल अछि।

खुजदारमे बाजार आ आवागमन प्रभावित

लॉकडाउनक कारण खुजदारमे बाजार बन्द अछि आ लोकक आवागमन प्रभावित भेल अछि। आवश्यक सामानक उपलब्धतामे सेहो कठिनाइक सामना करए पड़ि रहल अछि। सुरक्षा बल खुजदारक अतिरिक्त खारान, जेहरी, कालात, मूला आ जियारत सहित कतेको क्षेत्रमे जमीनी आ हवाई अभियान तेज कयने अछि।

खारान जिलाक लिज्जे क्षेत्रमे सेना संग ड्रोन आ हेलीकॉप्टरक गतिविधिक दाबी स्थानीय स्रोतसभ कएलक अछि। एकटा किसानक ड्रोन हमलामे मृत्यु भेलाक दाबी सेहो सामने आयल अछि, मुदा एहि दाबीसभक स्वतंत्र पुष्टि नहि भऽ सकल अछि।

सेना आ विद्रोही संगठनक परस्पर विरोधी दाबी

पाकिस्तानी सेनाक कहब अछि जे अभियान संदिग्ध उग्रवादीक विरुद्ध चलाओल जा रहल अछि। दोसर दिसि स्थानीय लोकक आरोप अछि जे सैन्य अभियानमे आम नागरिक सेहो प्रभावित भऽ रहल अछि।

बलूच लिबरेशन आर्मी (BLA) अपन गतिविधि बढ़ेलाक दावा कऽ रहल अछि। संगठन एक सप्ताहमे 38 हमलाक जिम्मेवारी लेलाक आ पाकिस्तानी सेनाक 32 जवानक मृत्यु भेलाक दावा कएलक अछि। एकटा प्रमुख गैस पाइपलाइन क्षतिग्रस्त भेलाक कारण क्वेटा सहित कतेको जिलामे गैस आपूर्तिपर असर पड़लाक रिपोर्ट अछि। एहि दावीक स्वतंत्र पुष्टि उपलब्ध नहि अछि।

प्रदर्शन आ धरना जारी

बलूचिस्तानक कतेको भागमे संचार आ इंटरनेट सेवा प्रभावित भेलाक खबरि अछि। एकर बावजूद युवा, महिला आ नागरिक समूह विरोध-प्रदर्शन जारी रखने अछि। बलूच यकजहती कमेटी सहित किछु संगठन लापता व्यक्तिक जानकारी, सैन्य अभियानपर रोक आ मानवाधिकारक संरक्षणक मांग कऽ रहल अछि।

प्रदर्शनकारी सड़क जाम आ धरनाक माध्यमसँ अपन मांग उठबैत अछि। सरकारक कार्रवाईमे बल प्रयोग, गिरफ्तारी आ गोलीबारीक आरोप सेहो सामने आयल अछि।

बलूच पक्षक किछु समूह अंतरराष्ट्रीय समुदायसँ एहि क्षेत्रक मानवाधिकार स्थिति पर ध्यान देबाक अपील करैत अछि। हालांकि बलूचिस्तानक वर्तमान घटनाक्रममे विभिन्न पक्षक दाबी आ आरोपक स्वतंत्र पुष्टि अलग-अलग स्तर पर उपलब्ध अछि।

बलूचिस्तानक बदलैत परिस्थितिपर नजरि बनौने राखब आवश्यक अछि, कारण सैन्य कार्रवाई आ नागरिक असंतोषक बीच क्षेत्रीय स्थिरतापर सेहो एकर व्यापक प्रभाव पड़ि सकैत अछि।