जेपीएससी परीक्षा विवादमे पैघ कार्रवाई, पूर्व अध्यक्ष एल. खियांग्ते बंदी

राँची । समदिया

झारखंड लोक सेवा आयोग (JPSC) परीक्षा विवादमे जांच एजेंसीक कार्रवाई तेज भऽ गेल अछि। JPSC-JSSC परीक्षा प्रक्रियामे कथित अनियमितता आ भ्रष्टाचारसँ जुड़ल मामिलामे आयोगक पूर्व अध्यक्ष एल. खियांग्तेकेँ गिरफ्तार कऽ लेल गेल अछि। हुनकर गिरफ्तारी पूर्व सदस्य अजिता भट्टाचार्यसँ पूछताछक बीच भेल अछि।

जांच एजेंसी पहिनेसँ एल. खियांग्तेक भूमिका पर नजरि रखने छल। एहि क्रममे हुनकर आवास सहित अन्य संबंधित ठामपर छापेमारी सेहो कएल गेल छल। छापेमारी आ पूछताछक दौरान परीक्षा प्रक्रियामे कथित गड़बड़ीसँ जुड़ल महत्वपूर्ण जानकारी जुटाओल गेल।

परीक्षा विवादमे बढ़ल जांचक दायरा

JPSC-JSSC परीक्षा विवादकेँ लऽ कऽ छात्र लगातार निष्पक्ष आ उच्चस्तरीय जांचक मांग करैत रहल छथि। छात्र सभक कहब अछि जे परीक्षा प्रक्रियामे कथित अनियमितताक लेल जिम्मेवार अधिकारी आ अन्य लोकक विरुद्ध कठोर कार्रवाई होय।

पूर्व अध्यक्ष एल. खियांग्तेक गिरफ्तारीक बाद जांचक दायरा आरो बढ़बाक संभावना अछि। CID कथित वित्तीय लेन-देनक कड़ी, परीक्षा प्रक्रियासँ जुड़ल लोकसभक भूमिका आ अन्य संभावित पहलुक जांच कऽ सकैत अछि।

2 करोड़क कथित लेन-देन पर सेहो पूछताछ

रिपोर्टक अनुसार, पूछताछक क्रममे करीब 2 करोड़ रुपैयाक कथित लेन-देनसँ जुड़ल जानकारी सामने आएल अछि। हालांकि, एहि संबंधमे आधिकारिक रूपसँ विस्तृत जानकारी एखनि धरि सामने नहि आएल अछि।

CID कथित भ्रष्टाचार, वित्तीय लेन-देन आ परीक्षा प्रक्रियामे पूर्व अध्यक्षक भूमिकाक संबंधमे पूछताछ कऽ रहल छल। गिरफ्तारीक बाद मामिलामे आगाँ आरो महत्वपूर्ण खुलासा हेबाक संभावना व्यक्त कएल जा रहल अछि।

JPSC परीक्षा विवादकेँ लऽ कऽ छात्र आंदोलनक बीच पूर्व अध्यक्षक गिरफ्तारीकेँ महत्वपूर्ण कार्रवाई मानल जा रहल अछि। एहि घटनाक बाद झारखंडमे राजनीतिक हलचल सेहो तेज हेबाक संभावना अछि।