शिक्षक मानक मंडल निर्धारणमे मैथिली विषयक उपेक्षा पर सौंपल गेल ज्ञापन
मैथिली साहित्यक एवं सांस्कृतिक समिति मधुबनी, जिला पदाधिकारी मधुबनीकेँ देलनि जनतब
मधुबनी । समदिया
मैथिली साहित्यिक एवं सांस्कृतिक समिति, मधुबनी द्वारा जिला पदाधिकारी, मधुबनीकेँ एकटा महत्वपूर्ण ज्ञापन सौंपि क’ शिक्षक मानक मंडल निर्धारणमे मैथिली विषयक उपेक्षा पर गम्भीर चिंता व्यक्त कएल गेल अछि। समिति मांग केलक अछि जे मैथिली भाषा संग होइत एहि भेदभावकें शीघ्र समाप्त क’ न्यायसंगत कार्रवाई कएल जाय।
समितिक प्रतिनिधि सभक कहब छल जे बिहारमे शिक्षक मानक मंडल निर्धारणसँ संबंधित वर्तमान प्रावधान सभमे मैथिली विषयक’ अपेक्षित स्थान नहि देल गेल अछि, जखनिकि मैथिली भारतीय संविधानक आठम अनुसूचीमे शामिल मान्यता प्राप्त भाषा अछि। मिथिला क्षेत्रक लाखों विद्यार्थीकें माध्यमिक आओर उच्च माध्यमिक स्तर पर मातृभाषाक रूपमे मैथिलीक पढ़ौनी होइत अछि।
ज्ञापनमे ईहो उल्लेख कएल गेल अछि जे विभागीय निर्देशक बावजूद जिला स्तर पर शिक्षा विभाग द्वारा आवश्यक संशोधन नहि कएल गेल, जाहि कारणे मधुबनी जिलाक अनेक प्रखंड सभमे मैथिली विषयक शिक्षक पद निर्धारित नहि भ’ सकल अछि। उदाहरण स्वरूप, राजनगर आ अंधराठाढ़ी जेकाँ प्रखंड सभमे अनेक उच्च माध्यमिक विद्यालय होइतहुं बहुत कम विद्यालयमे मात्र मैथिली विषयक पद स्वीकृत कएल गेल अछि। परिणामस्वरूप आगामी शिक्षक बहाली प्रक्रिया (TRE-4) मे माध्यमिक एवं उच्च माध्यमिक स्तर पर मैथिली विषयक पदक संख्या शून्य भ’ जेबाक स्थिति उत्पन्न भ’ गेल अछि।
समिति एकरा केवल विद्यार्थी आ शिक्षक सभक हितक विरुद्ध नहि, बल्कि भाषा संरक्षण, संवर्धन आ संवैधानिक सम्मानक प्रतिकूल सेहो मानलक अछि। एहि स्थितिसँ मैथिली विषयक विद्यार्थी आ शिक्षक सभक शैक्षणिक आ व्यावसायिक भविष्य पर प्रतिकूल प्रभाव पड़ि रहल अछि।
समिति जिला पदाधिकारीसँ आग्रह कएलक अछि जे शिक्षक मानक मंडलमे मैथिली विषयक उचित स्थान देबाक लेल आवश्यक कार्रवाई कएल जाय तथा ई-शिक्षा कोष पोर्टलपर’ फेरसँ रिक्ति सभक समुचित समावेश सुनिश्चित कएल जाय, जाहिसँ मैथिली भाषासँ कोनो प्रकारक भेदभाव नहि होय आ एहिसँ जुड़ल विद्यार्थी आ शिक्षक सभक हितक रक्षा भ’ सकय।
एहि अवसर पर समितिक अध्यक्ष चण्डेश्वर खाँ, सचिव आशीष कुमार मिश्र, वरिष्ठ साहित्यकार दिलीप कुमार झा, प्रभास कुमार दमन, पं. प्रजापति ठाकुर, सुमन कुमार सहित अनेक गणमान्य सदस्य उपस्थित छलाह।
