राजदक नव टीम बना रहलाह तेजस्वी, देखा चाही लालू प्रसादक करीबी नेतासभक भविष्य

पटना । समदिया

बिहार विधानसभा चुनाव 2025 मे करारी हारक बाद राष्ट्रीय जनता दल (राजद) मे संगठनात्मक स्तर पर व्यापक बदलावक तैयारी शुरू भ’ गेल अछि। तेजस्वी यादवक निर्देश पर राजदक प्रदेश अध्यक्ष मंगनी लाल मंडल पार्टीक सभ संगठनात्मक इकाइकेँ भंग क’ देने छथि। आब तेजस्वी यादवक नेतृत्वमे पार्टीक नव टीमक गठन होएत। एहि क्रममे पुरान नेतासभक रिपोर्ट कार्ड तैयार कएल जा रहल अछि आ नव टीममे युवासभक संग-संग सामाजिक समीकरणक विशेष ध्यान राखल जाएत।

79 विधायक सँ घटि 25 पर पहुंचल राजद

वर्ष 2020 केर बिहार विधानसभा चुनावमे राजद 75 सीट जीतिक’ राज्यक सभसँ पैघ राजनीतिक दल बनल छल। बादमे एआईएमआईएमक पाँच विधायकमे सँ चारि विधायक राजदमे शामिल भेला, जाहिसँ राजदक विधायकक संख्या 79 भ’ गेल छल। मुदा नवंबर 2025 केर विधानसभा चुनावमे राजदक संख्या घटिक’ मात्र 25 विधायक पर पहुंचि गेल।

तेजस्वी यादवकेँ राजदक राष्ट्रीय कार्यकारी अध्यक्ष सेहो बनाओल गेल अछि। पार्टीक वर्तमान राजनीतिक स्थिति एहेन अछि जे एक विधायकक एनडीएक दिसि झुकाव बढ़बाक चर्चा अछि। यदि ओ विधायक एनडीए खेमामे जाइत छथि तँ तेजस्वी यादवक नेता प्रतिपक्षक पद सेहो संकटमे पड़ि सकैत अछि।

बांकीपुर उपचुनावक हारिसँ बढ़ल चिंता

बांकीपुर उपचुनावमे राजदक कमजोर प्रदर्शन पार्टीक लेल चिंताक विषय बनल। चुनावी मैदानमे तेजस्वी यादवक देरीसँ उतरबाक कारण पार्टीक रणनीति पर सेहो सवाल उठल। राजद प्रत्याशी रेखा कुमारी गुप्ता अपन जमानत तक नहि बचा सकलीह।

एहि हारिक बाद पार्टीक भीतर संगठन, नेतृत्व आ चुनावी रणनीतिकेँ ल’ क’ मंथन तेज भ’ गेल। सोशल मीडिया पर यादव-मुस्लिम वोट बैंकमे कथित बदलाव, नेतासभक कम सक्रियता, आपसी खींचतान आ लालू परिवारमे मतभेदक चर्चा जोर पकड़लक।

भाई वीरेंद्र आ शक्ति सिंह यादवक विवादसँ गलत संदेश

एहि बीच राजद विधायक भाई वीरेंद्र आ पार्टीक मुख्य प्रवक्ता शक्ति सिंह यादवक बीच भेल सार्वजनिक टकराव सेहो कार्यकर्तासभक बीच चर्चाक विषय बनल। पार्टी नेतृत्वकेँ आशंका अछि जे एहि तरहक विवादसँ कार्यकर्तासभक बीच गलत संदेश जा रहल अछि।

रिपोर्ट कार्डक आधार पर भेटत मौका

राजद प्रदेश अध्यक्ष मंगनी लाल मंडल कहलनि जे संगठनात्मक इकाइ भंग करबाक निर्णय अचानक नहि लेल गेल अछि। विधानसभा चुनाव 2025 सँ पहिने नव टीम बनयबाक योजना छल, मुदा चुनावक कारण प्रक्रिया आगाँ नहि बढ़ि सकल। एकर बाद राज्यसभा चुनाव आ बांकीपुर उपचुनावक कारण सेहो संगठनमे बदलाव नहि कएल गेल।

आब आगाँ 2029 आ 2030 मे प्रमुख चुनाव हेबाक कारण पार्टी नव संगठन तैयार करबाक निर्णय लेने अछि। पुरान टीमक सभ इकाइक पदाधिकारीक रिपोर्ट कार्ड तैयार कएल जा रहल अछि। जिनकर प्रदर्शन बेहतर रहतनि, हुनका नव टीममे फेर मौका भेटि सकैत अछि।

राजदक नव संगठनमे युवा चेहराक भागीदारी, सामाजिक समीकरण आ क्षेत्रीय संतुलन पर विशेष ध्यान देबाक संकेत देल गेल अछि। प्रदेश अध्यक्षक अनुसार आगामी एक मासक भीतर सभ संगठनात्मक इकाइक नव गठन पूरा करबाक लक्ष्य अछि।

नव टीमक गठनसँ स्पष्ट होएत जे तेजस्वी यादव राजदकेँ कोन दिशा देबाक तैयारीमे छथि आ लालू प्रसादक समयक पुरान भरोसाक नेतासभमे केकरा स्थान भेटैत अछि आ के बाहर होइत छथि।