राहुल गांधीसँ किरेन रिजिजूक सकारात्मक वार्ता, संसदक गतिरोध समाप्त होएबाक जगल उम्मीद
सरकार कहलक— राजनीतिक मतभेद अपन जगह, मुदा राष्ट्रीय हितमे संसद चलब सभक साझा जिम्मेदारी
नई दिल्ली । समदिया
संसदक मानसून सत्रक दौरान लगातार हंगामा आ कार्यवाही बाधित होएबाक बीच बृहस्पतिकेँ केंद्रीय संसदीय कार्य मंत्री किरेन रिजिजू विपक्षक नेता राहुल गांधीसँ महत्वपूर्ण वार्ता कएलनि। रिजिजू एहि भेंटकेँ सकारात्मक बतबैत कहलनि जे सरकार विपक्षक संग निरंतर संवाद बनेने राखए चाहैत अछि आ संसदक सुचारु संचालन लेल सभ पक्षक सहयोग अपेक्षित अछि।
रिजिजू कहलनि जे राहुल गांधीसँ एकटा विशेष मुद्दा सहित आन महत्वपूर्ण विषयसभ पर चर्चा भेल। हुनकर अनुसार राजनीतिक मतभेद लोकतंत्रक स्वाभाविक हिस्सा अछि, मुदा राष्ट्रीय हित सर्वोपरि अछि। ओ कहलनि, “राजनीतिक विरोधी होयबाक अर्थ दुश्मन होयब नहि होइत अछि।”
लगातार बाधित भऽ रहल संसदक कार्यवाही पर चिंता व्यक्त करैत संसदीय कार्य मंत्री कहलनि जे सदन नहि चललासँ देशक जनता प्रभावित होइत अछि। हुनकर अनुसार संसदमे जनसरोकारक विषयसभ पर गंभीर चर्चा होयब आवश्यक अछि आ एहि लेल विपक्षसँ रचनात्मक सहयोगक अपेक्षा अछि।
गृह मंत्री अमित शाहक संसदमे उपस्थिति पर विपक्षक सवालक जवाब दैत रिजिजू स्पष्ट कएलनि जे अमित शाह नियमित रूपसँ संसदमे उपस्थित रहैत छथि आ आवश्यकतानुसार विधेयक सेहो प्रस्तुत करैत छथि। ओ कहलनि जे संसदीय परंपराक अनुसार जाहि मंत्रीक विधेयक पर चर्चा चलैत अछि, ओहि समय ओहि मंत्रीक सदनमे उपस्थित रहब जरूरी होइत अछि।
एहि बीच भाजपा सांसद रवि शंकर प्रसाद विपक्ष पर भीषण प्रहार करैत आरोप लगौलनि जे कांग्रेस गृह मंत्रीक उपस्थितिकेँ लऽ कऽ भ्रामक माहौल बनेबाक प्रयास कऽ रहल अछि। हुनका अनुसार अमित शाह प्रतिदिन संसद परिसरमे रहैत छथि आ बहसमे भाग लेबाक लेल तैयार छथि, मुदा लगातार हंगामाक कारण सदनक कार्यवाही प्रभावित भऽ रहल अछि।
एखनि सभक नजरि एहि बात पर टिकल अछि जे किरेन रिजिजू आ राहुल गांधीक बीच भेल सकारात्मक वार्तासँ संसदक गतिरोध समाप्त होएत कि नहि आ मानसून सत्रमे महत्वपूर्ण विषयसभ पर सार्थक चर्चा संभव भऽ सकत की ?
