पीओकेमे घनघोर तनाव, विरोध प्रदर्शनक बीच हिंसा, JAAC कहलक – 3 दिनमे 40 गोटेक मृत्यु
नई दिल्ली । समदिया
पाकिस्तान अधिकृत कश्मीर (PoK) मे विगत दू माससँ चलि रहल विरोध प्रदर्शन आ हिंसक झड़पक बीच स्थिति लगातार गंभीर बनल अछि। क्षेत्रमे प्रदर्शनकारीसभकेँ नियंत्रित करबाक लेल पाकिस्तानी सेनाक कारवाईक दौरान व्यापक हिंसा आ जनहानिक समाचार सामने आबि रहल अछि।
ज्वाइंट अवामी एक्शन कमिटी (JAAC) दावा कयलक अछि जे विगत तीन दिनमे सुरक्षा बलक कारवाईमे लगभग 40 गोटेक मृत्यु भेल अछि। JAAC केर नेता उमर नजीर कश्मीरी आरोप लगौने छथि जे सुरक्षाकर्मी निहत्था प्रदर्शनकारीसभ पर सीधा गोली चलौलनि आ एहि दौरान सैन्य-स्तरक हथियारक प्रयोग कएल गेल। हुनकर दावा अछि जे प्रदर्शनकारी सभक विरुद्ध ओहि हथियारसभक उपयोग भेल, जकर सामान्यतः नियंत्रण रेखा (LoC) अथवा भारतक विरुद्ध उपयोग होइत अछि। एहि हिंसामे उमर नजीर कश्मीरीक सहोदर भाइ सेहो गोली लगलाक कारणेँ मृत्युक शिकार भेलाह।
हालक हिंसक घटनाक्रम आ मृत्युक घटनाक बाद प्रदर्शनकारीसभ मुजफ्फराबाद दिसि जायवाला अपन लॉन्ग मार्च फिलहाल स्थगित कए देलनि अछि। आयोजकसभक कहब अछि जे गोलीबारीमे मृत व्यक्तिसभक अंतिम संस्कार आ दफन प्रक्रियाकेँ पूरा करबाक उद्देश्यसँ ई निर्णय लेल गेल अछि। हालांकि, ओ सभ स्पष्ट कएने छथि जे अंतिम संस्कारक प्रक्रिया पूरा होइतहि विरोध प्रदर्शन आ रैली फेरसँ आरम्भ कएल जाएत।
प्रदर्शनकारीसभक अनुसार, ओ सभ शांतिपूर्ण ढंगसँ अपन माँग राखि रहल छलाह आ लाखों लोक मुजफ्फराबादक सीमापार आगाँ बढ़बाक प्रयास कएने छलाह, मुदा सुरक्षा बलक कारवाईक बाद स्थिति बिगड़ि गेल। रिपोर्टसभक अनुसार, विगत 52–53 दिनक दौरान क्षेत्रमे भेल हिंसक घटनामे मृतकक कुल संख्या लगभग 100 धरि पहुँचि गेल अछि। एहि बीच इलाकामे इंटरनेट सेवा बाधित कएल जाएबाक समाचार सेहो अछि। तथापि, विभिन्न माध्यमसँ आन्तरिक स्थितिक सूचना बाहर आबि रहल अछि, जाहिमे सैकड़ों लोकक घायल होएबाक बात कहल जा रहल अछि।
एहि गंभीर संकटक बीच स्थानीय स्तर पर तीव्र प्रतिक्रिया देखल जा रहल अछि। प्रभावित क्षेत्रक नागरिकसभ अंतरराष्ट्रीय समुदायक समक्ष एहि स्थितिक संज्ञान लेबाक आ आवश्यक हस्तक्षेप करबाक अपील कएने छथि।
