भ्रष्ट अफसरसभ, कतेको RO-CO पर गिरल गाज, मंत्रीक सख्त संदेश – आब लापरवाही बर्दाश्त नहि

पटना । समदिया

बिहार सरकारक राजस्व आ भूमि सुधार विभाग भ्रष्टाचार, लापरवाही आ अनियमितताक विरुद्ध एकबेर फेर सख्त कदम उठौलनि अछि। विभाग राज्यक विभिन्न जिलामे कार्यरत 12 गोट राजस्व अधिकारी आ कर्मचारीक विरुद्ध विभागीय कार्रवाई शुरू कएने अछि। एहि नव कार्रवाईक संगहि पछिला लगभग दू महीनामे कार्रवाई झेलनिहार अधिकारी-कर्मचारीक कुल संख्या बढ़िकऽ 82 भऽ गेल अछि। विभाग स्पष्ट कएने अछि जे भ्रष्टाचार, सरकारी निर्देश केर अवहेलना, लापरवाही आ अनियमितता ककरो संग बर्दाश्त नहि कएल जाएत।

राजस्व आ भूमि सुधार मंत्री डॉ. दिलीप कुमार जायसवाल बुधदिन जारी बयानमे कहलनि जे सरकार राजस्व प्रशासनकेँ पूर्ण रूपसँ पारदर्शी, जवाबदेह आ जनहितमुखी बनेबाक लेल लगातार कड़ा निर्णय लऽ रहल अछि। हुनका अनुसार विभागमे “जीरो टॉलरेंस” नीति लागू अछि आ भ्रष्टाचार वा लापरवाही ककरो स्तर पर स्वीकार नहि कएल जाएत।

मंत्री कहलनि जे विभिन्न शिकायत, प्रशासनिक रिपोर्ट आ समीक्षा केर आधार पर जांच कएल गेल, जाहिमे प्रथम दृष्ट्या दोषी भेटल अधिकारीसभक विरुद्ध विभागीय आरोप पत्र तैयार कएल गेल अछि। किछु अधिकारीसभ पर वेतन वृद्धि रोकबाक संग अन्य विभागीय दंड सेहो देल गेल अछि, जखन कि किछु मामिलामे अनुशासनात्मक कार्रवाईक प्रक्रिया जारी अछि।

विभागक अनुसार मुंगेर भू-अर्जन कार्यालयमे पदस्थापित राजस्व अधिकारी-सह-कानूनगो अरविंद कुमार, वैशाली जिलाक राघोपुर अंचलक अंचल अधिकारी दीपक कुमार, आ मधुबनी जिलाक बिस्फीक तत्कालीन अंचल अधिकारी वंदना कुमारी केर विरुद्ध विभागीय आरोप पत्र गठित कएल गेल अछि। एहि मामिलाक विस्तृत जांच आबो जारी रहत।

गोपालगंज सदरक अंचल अधिकारी रजत कुमार वर्णवाल, सारण जिलाक एकमा अंचलक अंचल अधिकारी अमलेश कुमार, औरंगाबाद जिलाक गोहक तत्कालीन अंचल अधिकारी विश्वजीत नीलांकर, औरंगाबादक तत्कालीन अंचल अधिकारी अंशु कुमार सिंह, आ समस्तीपुर जिलाक कल्याणपुरक तत्कालीन अंचल अधिकारी राजन कुमार केर विरुद्ध वेतन वृद्धि रोकबाक सहित विभिन्न प्रकारक विभागीय दंड लगाओल गेल अछि।

पश्चिम चंपारण जिलाक रामनगरक तत्कालीन अंचल अधिकारी उदय शंकर मिश्रा, मुजफ्फरपुर जिलाक कुढ़नीक तत्कालीन अंचल अधिकारी रणभू ठाकुर, वैशाली जिलाक हाजीपुरक तत्कालीन अंचल अधिकारी अंजली कुमारी, आ रोहतास जिलाक सासारामक तत्कालीन अंचल अधिकारी सुधीर कुमार ओंकारा केर विरुद्ध सेहो विभागीय अनुशासनात्मक कार्रवाई शुरू कएल गेल अछि। नियमानुसार जांच आ कार्रवाईक प्रक्रिया जारी अछि।

डॉ. जायसवाल कहलनि जे विभागक जिम्मेदारी संभाललाक बाद लंबित मामिलासभक लगातार समीक्षा कएल जा रहल अछि। एहि क्रममे पछिला दू महीनामे आब धरि कुल 82 गोट अधिकारी आ कर्मचारी केर विरुद्ध कार्रवाई कएल जा चुकल अछि। एहि मामिलामे दाखिल-खारिजमे गड़बड़ी, भ्रष्टाचार, सरकारी काजमे लापरवाही, अनुशासनहीनता आ विभागीय निर्देश केर अवहेलना जेकाँ गंभीर आरोप शामिल छथि।

मंत्री कहलनि जे सरकारक प्राथमिकता आम नागरिककेँ समय पर, पारदर्शी आ सरल राजस्व सेवा उपलब्ध करेनाइ अछि। जँ ककरो अधिकारी वा कर्मचारीक कारण जनताकेँ परेशानी होइत अछि वा सरकारी काज प्रभावित होइत अछि, तऽ हुनकर विरुद्ध कड़ी कार्रवाई कएल जाएत।

राजस्व मंत्री स्पष्ट कहलनि जे सरकार ईमानदारीसँ काज करनिहार अधिकारी आ कर्मचारीसभक संग मजबूतीसँ ठाढ़ अछि। जे अधिकारी नियमक अनुसार पारदर्शी ढंगसँ काज करताह, हुनकाकेँ हर स्तर पर सहयोग आ संरक्षण देल जाएत। मुदा जे लोक अपन पदक दुरुपयोग करताह अथवा भ्रष्टाचार आ अनियमिततामे लिप्त भेटताह, हुनक विरुद्ध सख्त विभागीय कार्रवाई निरंतर जारी रहत।

हुनका अनुसार सरकारक उद्देश्य केवल कार्रवाई करब नहि, बल्कि सम्पूर्ण राजस्व व्यवस्थामे जवाबदेही आ पारदर्शिताक संस्कृति विकसित करब अछि, जाहिसँ आम नागरिककेँ दाखिल-खारिज, भूमि विवाद, भू-अर्जन आ अन्य राजस्व सेवामे अनावश्यक कठिनाइ नहि झेलए पड़य।

मंत्री अंतमे कहलनि जे जनहितसँ कियो समझौता नहि कए सकैत अछि। भविष्यमे जँ ककरो अधिकारी वा कर्मचारीक विरुद्ध भ्रष्टाचार, लापरवाही अथवा नियम उल्लंघनक शिकायत सही पाओल जाएत, तँ नियमानुसार कठोर विभागीय कार्रवाई निश्चित रूपसँ कएल जाएत। सरकारक स्पष्ट लक्ष्य अछि—राजस्व विभागकेँ पारदर्शी, जवाबदेह आ भ्रष्टाचारमुक्त बनाएब, जाहिसँ आम नागरिकक प्रशासन पर विश्वास आरो मजबूत भऽ सकय।