‘धीरज प्रतिभा सम्मान समारोह’क तैयारी पूर्ण : राजकुमार झा (अध्यक्ष, एमएसएस)

मुंबई समदिया!! “मैथिल समन्वय समिति अपन स्थापनाक संयोजक दिवंगत धीरज चन्द्र झाक स्मृतिमे विगत 2017 ईस्वींसँ दशवीं एवम् बारहवीं कक्षामे नीक अंक प्राप्त केनिहार छात्र/छात्राकेँ समारोहपूर्वक सम्मानित करैत आबि रहल अछि। समितिक संरक्षक डाॅ. संदीप झा द्वारा लेल गेल निर्णयक फलस्वरूप सम्मान समारोहक प्रतीक्षा मुंबई प्रवासी मिथिलावासी करैत छथि। जनतब दी जे कोरोना महामारीक भयावह संक्रमणक समय सेहो समिति ऑनलाइन आयोजन करैत सम्मान समारोहक परंपराकेँ बढ़बैत रहल।” ई उद्गार मैथिल समन्वय समितिक अध्यक्ष राजकुमार झा, मैपुप्र मुंबई समदियाक समक्ष व्यक्त कयलनि।

आगू आयोजन संबंधित जानकारी दैत झा कहलनि जे, “एहि वर्ष 02 अगस्त, 2026 केँ ठाणे स्थित राम गणेश गडकरी रंगायतन सभागारमे आयोजन होमय जा रहल अछि। सैकड़ों संख्यामे छात्र/छात्राक अंक-पत्र प्राप्त भऽ चुकल अछि। छात्र/छात्राकेँ सम्मान-पत्र, मोमेंटो तथा उपहार स्वरूप पारितोषिक द्वारा सम्मानित कयल जायत।”

समारोहक मुख्य अतिथि नित्यानंद झा (भारतीय पुलिस सेवा) एवम् विशिष्ट अतिथि अद्वैत चैतन्य प्रभुजी महाराज, इस्काॅन मंदिर, खारघर, नवी मुंबई उपस्थित भऽ छात्र/छात्राकेँ मार्गदर्शन करता। मैथिल समाजमे अपन विशिष्ट योगदान देनिहार पाँच वरिष्ठ समाजसेवी जयमाधव झा, चक्रधर झा, राजनारायण झा, विनोद कुमार झा ‘सरकार’ एवम् कृष्ण कुमार झा ‘अन्वेषक’ केँ प्रेरणा-सम्मान द्वारा सम्मानित कयल जायत। एकर अतिरिक्त तीन नगरसेवक मीनू धनंजय झा (विरार), शिवकुमार झा (कांदिवली-पोयसर) एवम् नवीन सिंह (मीरा-भायंदर) केँ सेहो अभिनंदन कयल जायत। पूर्व समारोहक अनुरूप सांस्कृतिक कार्यक्रमक भव्य प्रस्तुति सुप्रसिद्ध लोकप्रिय गायिका प्रिया मल्लिक द्वारा प्रस्तुत कयल जायत। कार्यक्रमक उपरांत प्रीतिभोजक विलक्षण व्यवस्था कयल गेल अछि