महाकवि पंडित लाल दासक स्मृति समारोहकेँ अगिला वित्तीय वर्षक सांस्कृतिक कैलेंडरमे शामिल करबा पर विचार ~ प्रमोद कुमार
पटना । समदिया
बिहार विधान परिषदमे शुक्रदिन परिषद केर माननीय सदस्य सर्वेश कुमार अल्पसूचित प्रश्न संख्या— 297 (1/2137)क माध्यम सँ किछु महत्वपूर्ण प्रश्न प्रस्तुत कएलन्हि। प्राप्त सूचनानुसार प्रश्नक चारि खंड छल जाहिमे सs पहिल छल “की ई सही अछि जे मैथिली भाषाक उन्नायक सभ में महाकवि विद्यापति, महाकवि चन्दा झा एवं महाकवि पंडित लाल दासक नाम अत्यंत आदर एवं सम्मानक संग लेल जाइत अछि?”
दोसर छल “की ई सही अछि जे माता सीताक चरित्र एवं आदर्श सभकें मैथिली साहित्यक माध्यम सँ व्यापक रूप सँ जन-जन धरि पहुँचाबय बला महाकवि पंडित लाल दासक स्मृतिमे राजकीय स्तर पर स्मृति समारोह आयोजित करबाक संबंध में एखन धरि कोनो निर्णय नहि लेल गेल अछि?”
तेसर छल “की ई सही अछि जे मधुबनी जिलाक खडौ़आ गाममे हुनकर परिजन एवं ग्रामीण आपसी सहयोग (चंदा) सँ प्रतिवर्ष हुनकर स्मृति दिवस आयोजित करैत छथि, मुदा एहि आयोजनक लेल सरकारक दिससँ कोनो प्रकारक आर्थिक सहायता अथवा अनुदान उपलब्ध नहि कराओल जाइत अछि?”
चारिम खंडमे छल “यदि उपर्युक्त खंडक उत्तर सकारात्मक अछि, तs की सरकार महाकवि पंडित लाल दासक स्मृति समारोह प्रतिवर्ष राजकीय स्तर पर आयोजित करबय चाहैत अछि? यदि हँ, तs कखिया धरि?”
प्रश्नक पहिल तीनू खंडक उत्तर सरकार द्वारा स्वीकारात्मक रहल। चारिम खंडक उत्तर के सन्दर्भमे सरकारक पक्ष स्पष्ट करैत बिहार सरकारक कला, संस्कृति एवं युवा विभागक माननीय मंत्री प्रमोद कुमार बतौलन्हि कि वर्तमान वित्तीय वर्षक सांस्कृतिक कैलेंडरक निर्माण भँ चुकल अछि। उक्त महोत्सव कें आगू बला वित्तीय वर्षक सांस्कृतिक कैलेंडरमे शामिल करबा पर विचार कएल जाएत।
पंडित लाल दास स्मृति समारोहक वार्षिक राजकीय आयोजनक सन्दर्भमे सरकारक उत्तर पर प्रसन्नता व्यक्त करैत सुविख्यात लेखक एवं इतिहासकार भैरव लाल दास, महाकवि पंडित लाल दासक प्रपौत्र सुनील कुमार दास, महेन्द्र लाल कर्ण, डॉ. विनोद कुमार कर्ण भागीरथ दास, अनूप कश्यप, मैथिलीक विद्वान साहित्यकार डॉ. रमानन्द झा ‘रमण’, शोधप्रज्ञ, विद्वान एवं प्रख्यात लेखक डॉ. रंगनाथ दिवाकर, सुप्रसिद्ध कवि, समीक्षक एवं कर्णप्रिय पत्रिकाक पूर्व प्रधान सम्पादक सुरेन्द्र शैल, अमल झा, डॉ. संजीव शमा, अजय कुमार दास, डॉ. विनय कर्ण, मिथिला पेंटिंग केर सुप्रसिद्ध कलाकार अलका दास, शम्भू ठाकुर, बद्री ठाकुर समेत अनेक गणमान्य लोक सभ सरकारक एहि नेक विचार आ सदप्रयासक सराहना कएलन्हि अछि। ध्यातव्य अछि जे आई माननीय एमएलसी सर्वेश कुमारक माध्यम सs सदनमे एहि मामिलाकें उठाबs सँ किछु समय पूर्व तत्कालीन कला-संस्कृति मंत्री अरूण शंकर प्रसाद सँ भेंट कsके सरकारी स्तरसँ ‘पंडित लाल दास जयंती समारोह’ मनेबाक लेल आग्रह कएल गेल छल जाहिमे बेगूसरायमे रहनिहार पत्रकार विनोद कर्ण जीक पैघ भूमिका रहल छल। विनोद कर्ण जीक एहि सक्रियता एवं सदप्रयासक लेल सुनील कुमार दास द्वारा कृतज्ञता ज्ञापित कएल गेलन्हि।
