दरिभंगामे छात्र आंदोलनक आड़मे पथराव, सिटी एसपी घायल, पुलिस कयलक लाठीचार्ज
दरिभंगा। समदिया
पटनामे भेल आयोजनक बाद बृहस्पतिकेँ दरिभंगामे सेहो जंतर-मंतर पर चलि रहल छात्र आंदोलनक समर्थनमे हजारों छात्र सड़क पर उतरल। प्रदर्शनक दौरान लहेरियासराय थाना क्षेत्रक लोहिया चौक पर स्थिति अचानक बिगड़ल आ किछु प्रदर्शनकारी पुलिस पर पथराव शुरू कय देलक। एकर बाद पूरा इलाकामे अफरा-तफरी मचि गेल आ पुलिसकेँ लाठीचार्जक संग आंसू गैसक गोला छोड़य पड़ल।
पथरावमे नगर पुलिस अधीक्षक (सिटी एसपी) अशोक कुमार चौधरी घायल भ गेलथि। हुनक पैरमे चोट लगयसँ खून बहय लागल। ओतय एक सिपाहीक चेहरा पर गंभीर चोट आयल अछि आ हुनका इलाजक लेल दरभंगा मेडिकल कॉलेज अस्पताल (डीएमसीएच)मे भर्ती कराओल गेल। एकर अलावा एक दर्जनसँ बेसी पुलिसकर्मी सेहो घायल भेल अछि। पथरावक चपेटमे कतेको राहगीर सेहो आबि गेल। जानतबक मोताबिक करीब एक दर्जन आम लोककेँ सेहो चोट पहुँचल।
हालात बिगड़लाक बाद पुलिस पहिने प्रदर्शनकारीकेँ समझाबय केर कोशिश कयलक, मुदा जखनि भीड़ नहि मानलक तँ लाठीचार्ज कयल गेल। एकर बाद भीड़केँ तितर-बितर करय लेल दंगा नियंत्रणक तहत सात राउंड आंसू गैसक गोला छोड़ल गेल।
जानतबक अनुसार करीब दू हजारसँ बेसी छात्र बिना कोनो पूर्व सूचनाक दरिभंगाक कर्पूरी चौक पर जमा भेल। ओतयसँ जुलूस निकालैत समाहरणालय रोड पहुंचल आ केंद्रीय शिक्षा मंत्रीक इस्तीफाक मांगकेँ ल कय प्रदर्शन करय लागल। ऐना बुझना जायत छल जे एही छात्रक आड़मे राजनीतिक लोक आ उपद्रवी सभ हिंसाकेँ भड़काबय लेल जमा भेल अछि। एही दौरान अचानक भीड़क एक हिस्सा पुलिस पर पथराव शुरू कय देलक, जाहि केर बाद स्थिति नियंत्रणसँ बाहर भ गेल।
घटनाक सूचना भेटैत जिलाधिकारी कौशल कुमार, डीआईजी मनोज कुमार तिवारी, एसएसपी जगुनाथ रेड्डी समेत भारी संख्यामे पुलिस बल मौका पर पहुंचल। अधिकारी हालातकेँ काबूमे करय लेल मोर्चा संभालनि आ पूरा इलाकेमे अतिरिक्त सुरक्षा बल तैनात कय देल गेल। घटनाक करीब दू घंटा बाद लहेरियासराय थाना क्षेत्रमे तनावपूर्ण माहौल बनल रहल। पुलिस पूरा क्षेत्रमे लगातार गश्त कय रहल अछि आ उपद्रव करय वला केर पहिचानक लेल जांच शुरू कय देलक।
