पटनामे सर्राफा कारोबारीक घर 50 लाख रुपयाक डकैती, 10 हथियारबंद बदमाश परिवारकेँ बनौलक बंधक
पटना। समदिया
बिहारमे अपराधीक मनोबल सातम आसमान पर अछि, बिना कोनो डरकेँ एक केर बाद एक अपराधकेँ अंजाम द रहल अछि। ताजा घटना पटना सिटीक भगवानगंजक मुख्य बाजारक ‘चांदनी अलंकर ज्वेलरी शॉप’मे भेल अछि, जतय अपराधी सर्राफा कारोबारीक घर आ दुकानकेँ निशाना बना कय ₹50 लाखसँ बेसीक डकैतीकेँ अंजाम देलक।
देर राति करीब 10 हथियारबंद बदमाश छतक रास्तासँ घरमे घुसि गेल, परिवारकेँ बंधक बना लेलक, आओर विरोध करय पर जानसँ मारय केर धमकी देलक। एकर बाद ओ सभ भागयसँ पहिने दोकान आ घर दुनू ठामसँ लाखों केर सोना-चांदीक गहना लूटि लेलक। ई घटना रविदिन राति करीब 1:30 बजे भगवानगंजक मुख्य बाजारक चांदनी अलंकार ज्वेलरी शॉपमे भेल।
ज्वेलरी कारोबारी दीपक सोनी घटनाक समय पूरा परिवार सुतल रहल बतौलनि। करीब 10 हथियारबंद बदमाश सीढ़ीक उपयोग कय पाछुसँ छत पर चढ़ि घरमे घुसि गेल। प्रवेश करैत देरी ओ सभ पूरा परिवारकेँ बंदूकक नोक पर बंधक बना लेलक। बदमाश सभ तिजोरीक चाभी मांगलक आ व्यवसायीकेँ धमकी दैत नीचा दोकानमे पहुँचल आ जबरदस्ती तिजोरी खोलबेलक। जखन ओ विरोध कयलनि तखन ओ सभ हुनका मारबाक धमकी देलक, चेतावनी देलक जे जँ ओ अलार्म बजाओत तँ “गोली मारि देत”। दोकान एवं घरसँ लाखों केर गहनाक लूट भेल।
व्यवसायीक अनुसार, बदमाश सभ दोकानक तिजोरीसँ लगभग 200-250 ग्राम वजनक सोनाक गहना (जकर कीमत लगभग ₹21 लाख) आ लगभग 15 किलोग्राम वजनक चांदीक गहना (मूल्य ₹30 लाखसँ बेसी) लूटि लेलक। एकर बाद अपराधी घरमे महिला सभकेँ मजबूर कय देलक जे ओ सभ अपन पहिरल सोनाक गहना निकालथि। अलमारी आ तिजोरीमे राखल आन गहना सेहो लऽ गेल।
अपराध केलाक बाद बदमाश व्यवसायीक एकटा मोटरसाइकिल आ हुनक मोबाइल ल कय भागि गेल। मुदा बादमे पुलिस जहानाबाद जिलासँ मोटरसाइकिल बरामद कय लेलक। परिवारक सदस्य दावा अछि कि अपराधी सोना-चांदीक गहना आ कुल ₹50 लाखसँ बेसी केर अन्य सामान ल कय भागल।
घटनाक जानकारी भेटला पर भगवानगंज पुलिस मौका पर पहुंचल आ जांच शुरू कय देलक। पुलिस अपराध स्थलक निरीक्षण कयलक आ लगपासक सीसीटीवी कैमरासँ फुटेजकेँ जांच करय लागल। अधिकारी कहलनि जे, मामिलाक गंभीरतासँ जांच भ रहल अछि। बरामद मोटरसाइकिल आ सीसीटीवी फुटेजक आधार पर अपराधीक पहिचान करबाक प्रयास चलि रहल अछि। संदिग्धकेँ नुकायल संभावित जगह पर छापामारी भ रहल अछि आ अधिकारीक दावा अछि जे जल्दिये पूरा गिरोहक पर्दाफाश भ जायत।
