बांकीपुर सीटसँ वीणा मानवी केर नामांकन रद्द

पटना। समदिया

बिहारक हाई प्रोफाइल बांकीपुर विधानसभा सीटक उपचुनावकेँ ल कय खबरि सामने आयल अछि जे तेज प्रताप यादवक पार्टी जन शक्ति जनता दल (जजद) केर प्रतिनिधित्व करय वाली प्रत्याशी वीणा मानवी केर नामांकन रद्द कय देल गेल अछि। खबरि केर अनुसार तेज प्रताप यादव बहुत देर धरि ओतय इंतजार कयलाह आ ओकर बाद कलेक्ट्रेटसँ वापस आबि गेलाह। ओ आरोप लगौलनि जे सरकार हुनक उम्मीदवारक खिलाफ साजिश रचि रहल अछि आ घोषणा कयलनि जे ओ मामिला केर कोर्टमे ल जयताह।

ध्यान देबऽ वला बात ई अछि कि जन शक्ति जनता दलक उम्मीदवार वीणा मानवी सोमदिन कोर्टसँ जमानत हासिल कय लेने छलीह। एहिसँ पहिने ओहि दिन हुनक नामांकन दाखिल कयला केर तुरंत बाद पुलिस हुनका कथित धोखाधड़ीक मामिला (आईपीसी धारा 420) मे कलेक्टर परिसरसँ गिरफ्तार कय लेने छल। हुनक गिरफ्तारीक खबरिसँ हुनक समर्थक आ पार्टीक कार्यकर्ताक जुटान भ गेल। खबरि अछि कि ई मामिला धारा 420 केर तहत दर्ज पूर्व मौजूदा मामिलासँ जुड़ल अछि।

जन शक्ति जनता दलक राष्ट्रीय अध्यक्ष तेजप्रताप यादव आ उम्मीदवार वीणा मानवी एकरा राजनीतिक षड्यंत्र बतौलनि अछि। हुनक आरोप अछि कि ई कार्यवाही हुनका चुनाव लड़य सँ रोकय आ राजनीतिक नुकसान पहुँचाबय केर उद्देश्यसँ कयल गेल अछि। निष्पक्ष जांचक मांग करैत ओ कहलनि जे कानूनक दुरुपयोग नहि करबाक चाही।

बांकीपुर विधानसभा उपचुनाव पहिनेसँ बिहारमे सबसँ बेसी चर्चामे आबय वला मुकाबलामे शामिल अछि। एही बीच नामांकनक दिन उम्मीदवारक गिरफ्तारी, ओकर बाद जमानत आ आब नामांकन रद्द भेलाक घटनासँ गहन अटकलबाजीकेँ बढ़ावा देलक अछि। जनतब अछि जे बांकीपुर चुनावी मैदानमे नीरज कुमार सिन्हा (भाजपा) आ रेखा गुप्ता (राजद) प्रमुख दावेदार छथि।