सीमा सड़कक नाम पर सरकारी धनक लूट, बीआरओ घोटालामे सीबीआई 26 स्थान पर एक संग कयलक छापामारी
नई दिल्ली। समदिया
केंद्रीय जांच ब्यूरो (सीबीआई) सीमा सड़क संगठन (बीआरओ) केर भीतर सरकारी धनक कथित दुरुपयोग आ काल्पनिक मजदूरकेँ भुगतान करय वला चारि मामिलाक जांचक तहत 11 राज्य आ केंद्र शासित प्रदेशक 26 स्थान पर छापा मारलक। जांचमे 10 अधिकारी सहित कतेको व्यक्ति पर धोखाधड़ी, जालसाजी आ भ्रष्टाचारक आरोपक जांच भ रहल अछि। तलाशीक दौरान महत्वपूर्ण दस्तावेज आ डिजिटल सबूत सेहो बरामद कयल गेल।
इ तलाशी अभियान जम्मू-कश्मीर, लद्दाख, दिल्ली, हरियाणा, उत्तराखंड, उत्तर प्रदेश, बिहार, महाराष्ट्र, असम, अरुणाचल प्रदेश आ नागालैंडमे चलाओल गेल। एही कार्यवाहीमे लद्दाखमे बीआरओ केर ‘प्रोजेक्ट विजयक’ आ ‘प्रोजेक्ट योजक’ सँ जुड़ल वित्तीय अनियमितताक जांचक हिस्सा अछि।
सीबीआई केर अनुसार जांचक केंद्रमे कैजुअल लेबर (अस्थायी मजदूर) केर तैनाती आ काल्पनिक मजदूरकेँ मजदूरी देबयमे कथित गड़बड़ी पर अछि। एजेंसीकेँ आशंका अछि जे एहि तरीकामे सरकारी धनक पैघ पैमाना पर दुरुपयोग शामिल छल।
बीआरओ केर तकनीकी अधिकारी बोर्ड द्वारा कयल गेल आंतरिक जांचक बाद सीबीआई रक्षा मंत्रालय द्वारा दायर कयलऽ गेल आपराधिक शिकायतक आधार पर चारि प्राथमिकी दर्ज कयलक अछि। प्रारंभिक जांचमे तैनाती आ मजदूरीक भुगतानसँ जुड़ल वित्तीय गड़बड़ीक पता चलल अछि।
जांचमे सरकारी धनक दुरुपयोग, धोखाधड़ी, जालसाजी, आपराधिक विश्वासक उल्लंघन आ आपराधिक साजिश जँका अपराध शामिल अछि। एकर अलावा भ्रष्टाचार निवारण अधिनियम 1988 केर तहत आपराधिक दुराचार आ घूसखोरीक आरोपक सेहो जांच कयल जा रहल अछि।
एफआईआरमे कुल 10 अधिकारीक नाम अछि, जाहिमे लेफ्टिनेंट कर्नल, मेजर रैंकक अधिकारी आ इंजीनियर शामिल छथि। एकर अलावा कतेको निजी व्यक्ति केर सेहो जांच जारी अछि। एजेंसीक कहनाय अछि जे छापेमारीक दौरान कतेको महत्वपूर्ण दस्तावेज आओर डिजिटल सबूत बरामद भेल अछि। एहि दस्तावेज पर फोरेंसिक आ तकनीकी जांच चलि रहल अछि। सीबीआईक कहनाय अछि जे ओ एहि मामिलाक निष्पक्ष आओर व्यापक जांचक लेल प्रतिबद्ध अछि। एजेंसी आश्वासन देलक अछि जे जल्दसँ जल्द जांच पूरा करबाक प्रयास कयल जाएत।
जनतब दी जे सीमा सड़क संगठन (बीआरओ) देश केर सीमावर्ती क्षेत्रक संग-संग भारत केर दोस्ताना पड़ोसी देशमें सेहो सामरिक महत्वक सड़क आ बुनियादी ढाँचाक निर्माण आ रखरखाव करैत अछि। राष्ट्रीय सुरक्षाक दृष्टिकोणसँ एकर भूमिका बहुत महत्वपूर्ण मानल जायत अछि।
