अमित शाहक कोलकाता यात्रासँ पहिने श्यामा प्रसाद मुखर्जीक मूर्तिक तोड़फोड़, पुलिस जांच जारी अछि
कोलकाता। समदिया
केंद्रीय गृहमंत्री अमित शाहक कोलकाताक निर्धारित यात्रासँ मात्र एक दिन पहिने श्यामा प्रसाद मुखर्जीक मूर्ति तोड़फोड़ भ गेल। पुलिस एहि घटनाक जांच शुरू कय देलक अछि, जखन कि भाजपा कड़ा विरोध जतौलक अछि। पुलिसक अनुसार मध्य कोलकाताक सुखिया स्ट्रीट इलाकामे स्यामा प्रसाद मुखर्जीक मूर्ति राखल कुर्सीक निचला हिस्सा टूटल भेटल अछि। हालहिमे हुनक 125म जन्मदिन पर एहि मूर्तिकेँ स्थापित कयल गेल छल आ एकर उद्घाटन सोमदिन राज्य भाजपा नेता द्वारा करबाक छल। कुर्सी पर एकटा नेमप्लेट पहिनेसँ चिपकल छल आ शनि दिनक राति धरि तैयारीक सभटा काज पूरा भ गेल छल, मुदा रविदिन भोरमे जखन लोक एहि ठाम पहुंचल तँ कुर्सी क्षतिग्रस्त भेटल।
पुलिसक एकटा वरिष्ठ अधिकारीक कहनाय छनि जे ई घटना आधा रातिक बाद भेल अछि। फिलहाल पुलिस तोड़फोड़ करय वला केर पहचान करय लेल लगपासक सीसीटीवी कैमरासँ फुटेजक जांच कय रहल अछि।
एहि घटना पर भाजपा कड़ा प्रतिक्रिया देलक अछि। भारतीय जनता युवा मोर्चा एमहर्स्ट थानामे शिकायत दर्ज करा अपराधी पर सख्त कार्यवाहीक मांग कयलक अछि।
अहिना, केंद्रीय गृहमंत्री अमित शाह सोमदिन कोलकाता पहुंचय वला छथि आओर श्यामा प्रसाद मुखर्जीक 125म जयंती पर आयोजित कार्यक्रममे शामिल होय वला छथि। भाजपा सरकार एहि अवसर पर 6 जुलाईकेँ राज्य अवकाश घोषित कय देलक अछि।
भाजपाक कार्यक्रमक अनुसार अमित शाह आइ सोमदिन दुपहर 3:50 बजे नेताजी सुभाष चंद्र बोस अंतरराष्ट्रीय हवाई अड्डा पहुंचताह। ओतयसँ सीधा दक्षिण कोलकाताक भवानीपुर स्थित श्यामा प्रसाद मुखर्जीक आवास पर अपन मूर्ति पर पुष्प श्रद्धांजलि देबय लेल आगू बढ़ताह।
एकर बाद 4:50 बजे न्यू टाउन केर इको पार्क पहुँच श्यामा प्रसाद मुखर्जी केर 125 फीट ऊँच मूर्ति केर शिलान्यास कयल जायत। एहि अवसर पर पश्चिम बंगाल भाजपा नेता शुभेन्द्रू अधिकारी आओर प्रदेश भाजपा अध्यक्ष समिक भट्टाचार्य सेहो मौजूद रहताह। 5:30 बजे अमित शाह विश्व बांग्ला मेला प्रांगणमे आयोजित श्यामा प्रसाद मुखर्जीक जयंती समारोहमे हिस्सा लेताह। आयोजन समाप्त भेलाक बाद ओ दिल्ली वापस आबि जेताह।
सोमदिन भाजपा मध्य कोलकाताक मुरलीधर सेन लेन पर स्थित अपन राज्य कार्यालयमे सेहो कतेको कार्यक्रमक आयोजन कयलक अछि। भाजपाक प्रदेश अध्यक्ष समिक भट्टाचार्य कहलनि जे, “ई सभ भाजपा कार्यकर्ताक लेल अपार खुशीक अवसर अछि। पश्चिम बंगालक सभ भाजपा कार्यकर्ताक लेल ई ऐतिहासिक दिन अछि, चाहे ओ बहुत दिनसँ पार्टीक विचारधारासँ जुड़ल होथि वा हालक सालमे भाजपामे शामिल भेल होथि। केंद्रीय गृहमंत्री 6 जुलाईकेँ एहि उत्सवमे हमरा सभ संग जुड़य लेल आबि रहल छथि। ई निस्संदेह एकटा ऐतिहासिक क्षण अछि।”
