मिथिलासँ मगध लेल एक आओर पूल, गाड़ी 100 किमी/घंटाक रफ्तारसँ चलत

पटना। समदिया

कच्ची दरगाह-बिदुपुर 6 लेन वला गंगा पुल जुलाईमे खुजय वला अछि। लगभग 9.75 किलोमीटर लंबा इ पुल सीधा उत्तर आ दक्षिण बिहारकेँ जोड़त। ₹4,988 करोड़क लागतसँ बनल एहि पुलसँ महात्मा गांधी सेतु पर दबाव कम भ जाएत। एहि पुल पर गाड़ी 100 किमी/घंटाक रफ्तारसँ चलि सकैत अछि।

बिहारक बुनियादी ढांचाकेँ नव बढ़ावा देबय वला कच्ची दरगाह-बिदुपुर 6 लेनक गंगा पुल अगिला मास जनताक लेल खोलल जाएत। लगभग 9.75 किलोमीटर लंबा ई पुल राज्य केर गंगा नदी पर बनलसँ लम्बा पुल अछि। लगभग ₹4,988 करोड़क लागतसँ बनल एहि महत्वाकांक्षी परियोजना पर 98 प्रतिशतसँ बेसी निर्माण काज पूरा भ गेल अछि आ अंतिम तकनीकी काज तेजीसँ आगू बढ़ि रहल अछि।

19.76 किलोमीटर लंबा एहि परियोजनामे 10 किलोमीटरक एप्रोच रोड शामिल अछि। गंगा पर बनल पुल 9.75 किलोमीटर लंबा अछि। निर्माण एजेंसीक लक्ष्य अछि जे जुलाईक पहिल सप्ताह धरि एहि परियोजनाकेँ पूरा कय खोलल जाए, जाहिसँ इ सुनिश्चित कयल जाएत जे राघोपुर दियारा क्षेत्रक लोककेँ मानसूनक मौसममे कोनो तरहक परिवहन समस्याक सामना नहि करय पड़य।

एखन मिथिलासँ आबय वला लोककेँ गांधी सेतु पार करय पड़ैत अछि। एहि लोककेँ गांधी सेतु पर रोज जाम के सामना करय पड़ैत छल, जे प्रायः घंटों धरि रहैत छल। एहि पुलकेँ खुजलासँ आब 15 सँ 20 मिनटमे घंटा भरि केर यात्रा पूरा भ जाएत। लोककेँ रोजक जामसँ सेहो राहत भेटत।

कच्ची दरगाह-बिदुपुर पुल सीधा मिथिला आ मगधकेँ जोड़त। एकरा खुजलासँ महात्मा गांधी सेतु पर सेहो भारी यातायात केर दबाव कम भ जायत जे सालोंसँ अछि। एहि अत्याधुनिक, 6 लेन वला पुल पर गाड़ी 100 किलोमीटर प्रति घंटाक रफ्तारसँ यात्रा कय सकैत अछि, जाहिसँ यात्राक समय कम भ जाएत।

एशियाई विकास बैंक एहि परियोजना लेल ₹3,396 करोड़क ऋण देलक अछि, जखनकि जमीन अधिग्रहण पर लगभग ₹697 करोड़क लागत आयल अछि। एही पुल केर निर्माण दक्षिण कोरिया केर डेवू कंपनी आ लार्सन एंड टुब्रो मिलकय कय रहल अछि।

ई पुल पटना-बख्तियारपुर बाईपास (एनएच 30-30) केँ सीधा बिदुपुर (एनएच 103)सँ जोड़त। एहि मार्गसँ पटना रिंग रोड आ आमस-दरभंगा एक्सप्रेसवे सेहो जुड़त। एहिसँ वीर कुंवर सिंह सेतु (आरा-छपरा) आ बिहटा-कोइलवार पुल पर भारी वाहनक दबाव कम भ जाएत, जाहिसँ यात्रा आसान भ जाएत।