ममता बनर्जी आ अरविंद केजरीवालक कारण इंडि गठबंधन टूटल : संजय झा

नई दिल्ली। समदिया

जदयूक कार्यवाहक अध्यक्ष संजय झा एकटा पैघ दावा काल्हि कयलनि। ओ विपक्षी दल पर हमला करैत इंडि गठबंधनमे विभाजन लेल अरविंद केजरीवाल आ ममता बनर्जी के जिम्मेदार ठहरौलनि। ओ कहला जे नीतीश कुमार सभकेँ एक मंच पर एक ठाम अनलथि, मुदा जखन चुनावक संबंधमे सहयोगीसँ देशमे एकता आ दूर दृष्टि नहि देखबामे आयल तँ ओ सभ अलग हेबाक फैसला केलथि।

2023मे पटनामे नीतीश कुमारक आवास पर भेल इंडिया ब्लॉकक पहिल बैसारक बारेमे पूछला पर जदयू नेता संजय झा सँ किछु समय बाद किएक चलि गेलाह तँ जदयू नेता संजय झा कहला जे दू गोटे एहि इंडि गठबंधनकेँ तबाह कय देलथि, हुनकर नाम ममता बनर्जी आ अरविंद केजरीवाल अछि।

ओ आगू कहलनि जे, “इंडि ब्लॉकक भीतर सहमति बनल। हम ई नहि कहि रहल छी जे नीतीश कुमारकेँ प्रधानमंत्री पदक उम्मीदवारक रूपमे प्रोजेक्ट कएल गेल छल। सहमति बनल, मुदा बैसारमे दुनू गोटे कहलनि जे दलित संयोजक हेबाक चाही। मल्लिकार्जुन खड़गे केँ रहबाक चाही। ई कहि ओ सभ कांग्रेसकेँ बैकफुट पर राखि देलनि। आइ ओ सभ राजनीतिमे जतय ठाढ़ छथि ओतय केर हाल सभक सामने अछि।”

मीडियासँ गप्प करैत संजय झा कहलनी जे नीतीश कुमारकेँ संयोजक हेबाक बात बिल्कुल नहि छल, एहि गठबंधनसँ हुनक अपन विश्वसनीयता छल, ओ सभ ठाम घुमैत छलाह, दोसर नेतासँ गप्प करैत छलाह। सभकेँ एक मंच पर एक ठाम अनलथि। मुदा बैसारमे एहन बजलासँ कांग्रेस बैकफुट पर चलि गेल।

ओ इहो कहलनि जे, “हम फेर देखलहुं जे एहि गठबंधनमे कोनो योजना नहि छल जे हम चुनाव कोना करब। कोनो एकता नहि छल। हमरा सभकेँ क्षेत्रीय दल केँ लागल जे कांग्रेस जे केवल किछु राज्यमे अपन राजनीति पर ध्यान केंद्रित करैत अछि, ओकरा कोनो खास फर्क नहि पड़ैत अछि। हमर व्यक्तिगत मानब अछि जे ममता बनर्जी आ अरविंद केजरीवाल एही गठबंधनकेँ समाप्त कय देलथि।”

जखन संजय झा सँ पूछल गेल जे भाजपा केर खिलाफ इंडि गठबंधन किएक बनल, बादमे जदयू एनडीएसँ गठबंधन किएक केलक तँ संजय झा कहलनि जे, बिहारमे कोनो नहि कोनो गठबंधनमे काज करय पड़ैत अछि, ई बात सही अछि जे इंडि गठबंधन बनेबामे नीतीश कुमारक अहम भूमिका छल, मुदा जखन हुनका बुझायल जे ई आगू नहि बढ़ि रहल अछि आओर हुनक कोनो विजन नहि अछि तँ ओ अलग हेबाक फैसला कयलनि।

ओ इहो कहलनि जे, सिर्फ मोदी आ भाजपाक विरोध करब काज नहि करैत अछि। अहां सभकेँ अपन नजरिया सेहो जनताक सामने जरूर राखय पड़त। नीतीश कुमार बहुत प्रयास कयलनि। ओ भाजपाक संग मिलिकय बिहारमे क्षेत्रीय पार्टीक रूपमे काज कयलनि किएक तँ हमरा सभ लग दोसर कोनो विकल्प नहि छल, इएह सच्चाई अछि आओर हम सभ बिहारमे मिलिकय काज कय रहल छि।