5 देशरत्न मार्ग स्थित बंगला आब मुख्यमंत्री आवासमे नहि होयत समाहित

पटना। समदिया

बिहारमे सरकारी आवासकेँ ल कय राजनीतिक विवाद कम हेबाक कोनो संकेत नहि देखा रहल अछि। एही बीच सरकार मुख्यमंत्रीक आवासक संबंधमे एकटा महत्वपूर्ण फैसला लेलक अछि, जाहिमे 5 देशरत्न मार्गक बंगलाकेँ 1 अणे मार्गक आवाससँ एकीकृत नहि करबाक विकल्प चुनल गेल अछि। भवन निर्माण विभाग पिछला अधिसूचना कए रद्द कय देलक अछि, जाहिमे 5 देशरत्न मार्गकेँ मुख्यमंत्रीक आधिकारिक आवासमे विलय करबाक मांग छल। भवन निर्माण विभाग द्वारा जारी कार्यालय आदेशमे कहल गेल अछि जे, मुख्यमंत्रीक आवासक रूपमे कर्णांकित आवास संख्या 1, अणे मार्ग (लोक सेवक आवास) केर मरम्मत काज होयबाक कारण आवास संख्या 5, देशरत्न मार्ग, पटनाकेँ अस्थायी रूपसँ 1 अणे मार्गक विस्तारित अंशक रूपमे चिन्हित कयल गेल छल । वर्तमानमे लोक सेवक आवास, 1 अणे मार्गक मरम्मतक बाद उपलब्ध अछि, ताहि लेल आब 5 देशरत्न मार्ग आवासकेँ अस्थाई आवंटन रद्द कयल जा रहल अछि। जनतब दी जे सम्राट चौधरी मुख्यमंत्री बनयसँ पहिने उपमुख्यमंत्रीक तौर पर 5 देशरत्न मार्ग आवासमे रहय छलाह।

एहीकेँ ल विपक्ष सरकार पर हमलावर छल। दरअसल, बिहारमे सरकारी आवास आवंटनकेँ ल कय सियासत गरम अछि। पूर्व मुख्यमंत्री राबड़ी देवीक आवासकेँ खाली करबाक आदेश देल गेल अछि। राबड़ी देवी आवास खाली करयसँ इनकार कय देलनि अछि।

एकर बाद राजद नेता सरकारकेँ मुख्यमंत्री आवासमे एक आओर आवासकेँ समाहित करबाक निर्णय पर विरोध जतौने छलथि। राजद केर प्रधान महासचिव अब्दुल बारी सिद्दीकी प्रेस कॉन्फ्रेंस कय कहने छलथि कि देशक सबसँ गरीब राज्यक मुख्यमंत्रीक बंगला भारतक सबसँ आलीशान, भव्य आ सात सितारा बंगला जँका अछि। सम्राट चौधरीक बंगला प्रधानमंत्रीक बंगलासँ बेसी पैघ अछि।

मुख्यमंत्री पूर्वमे उपमुख्यमंत्रीक नाम कर्णांकित 5, देशरत्न मार्गकेँ सेहो मुख्यमंत्री निवासमे मिला लेलनि अछि। सीएम सम्राट चौधरी दिल्लीमे बिहार निवास आ बिहार भवन केर बजाय टाइप-8 बंगला सेहो लेलनि। ओ अपन निवास लगभग 15 एकड़सँ बेसीमे कय लेलनि अछि।